بەرەی گەل: گیانی سەرۆك و ئەندامانمان لە ئەستۆی سەرۆكی یەكێتییە

پەیام 

بەرەی گەل راگەیەنراوێكی بڵاوكردەوە و داوا لە كۆنسووڵخانە، نوێنەرایەتییەكان و حكومەتی فیدراڵ و هەرێمی كوردستان دەكات لەبەرانبەر ئەو كردەوانە بێدەنگ نەبن و راشیگەیاندووە، "گیانی لاهوور شێخ جەنگی و ئەندامانی بەرەی گەل لە ئەستۆی سەرۆكی یەكێتییە".

لە بەرانبەردا دەزگای ئاسایش راگەیاندراوێكی لەبارەی رووداوەكەی لالەزار بڵاوكردەوە و رایگەیاند، داواكراوەكان ئامادەنەبوون خۆیان رادەست بكەن و تەقەیان لە هێزەكانی ئاسایش كردووە.

لە بەشێكی دیكەی راگەیاندراوەكەدا ئاماژە بەوەكراوە، پرۆسەكە پاڵپشت بە بڕیاری دادگا هەنگاوەكانی نراون لەپێناو جێبەجێكردنی فەرمانی دەستگیركردن بووە، كە لەلایەن خودی دادوەر بڕیارەكە دەرچووێندراوە.

بەرەبەیانى ئەمڕۆ 22ى 8ى 2025 لە ئوتێل لالەزار لە سلێمانى، شەڕ لە نێوان هێزە ئەمنییەکان و هێزەکەى لاهور شێخ جەنگى سەرۆکى بەرەى گەل دەستیپێکرد، سەرەنجام دواى چەند کاتژمێرێک لە شەڕ لاهوور شێخ جەنگی و پۆڵادی برای دەستگیر كران، بەهۆى شەڕەکەشەوە 10 کەس لە هەردوولا کوژران و دەیانى دیکەش برینداربوون.