7 کاتژمێر پێش ئێستا
92 جار خوێنراوەتەوە
دادگای فیدڕاڵی ئەمریكا: ترەمپ دەسەڵاتی سەپاندنی باجی گومرگی بەسەر هەموو وڵاتاندا نییە
پەیام
دادگای تێهەڵچوونەوەی فیدڕاڵی ئەمریكا كۆتوبەندی خستە سەر دەسەڵاتی سەرۆكی وڵاتەكەی بۆ سەپاندنی باجی گومرگیی بەسەر تەواوی وڵاتانی جیهاندا.
لەوبارەیەوە دادگاكە ڕوونیكردووەتەوە "ڕاگەیاندنی دۆخی نائاسایی نیشتمانی و سەپاندنی باج لەسەر كاڵا هاوردەكان لە زۆرینەی وڵاتانی جیهانەوە پشتی بە هیچ دەسەڵاتێكی یاسایی نەبەستووە، بەڵكو زیاتر لەسەر بنەمای بڕیارێكی دادگای بازرگانی فیدراڵی تایبەتمەندە لە نیویۆرك كە ئایار، واتە مانگی پێنجی ساڵی ڕابردوو دەریكردووە".
لە دەقی بڕیارەكەی دادگای تێهەڵچوونەوەی فیدڕاڵییدا هاتووە: پێناچێت كۆنگرێس نیازی ئەوەی هەبووبێت دەسەڵاتی بێسنوور بۆ سەپاندنی باجی گومرگیی بە سەرۆك بدات.
لەگەڵ ئەم بڕیارە نوێیەی دادگاشدا، بەڵام دادوەرەكان بڕیاریان هەڵوەشاندنەوەی دەستبەجێی باجە گومرگییەكانیان نەداوە و جێبەجێكردنەكەیان بۆ تشرینی یەكەم واتە مانگی 10 دواخستووە، ئەوەیش كات بە ئیدارەكەی ترەمپ دەدات تا لە دادگای باڵا تانەی لێ بدەن.
لەبارەی بڕیارەكەی دادگای تێهەڵچوونەوەی فیدڕاڵییەوە، دۆناڵد ترەمپ لە تروس سۆشیالەوە بەڵێنی ئەوەی داوە تانە لە بڕیارەكە بدات و ڕایگەیاندووە: ئەگەر ڕێگە بە جێبەجێكردنی ئەم بڕیارە بدرێت بە تەواوی ویلایەتە یەكگرتووەكان خاپوور دەبێت.
لە تۆڕە کۆمەڵایەتیەکان شەیری بکە