2 رۆژ پێش ئێستا
178 جار خوێنراوەتەوە
فواد حسێن: لە ماوەی سێ ڕۆژدا كێشەكانی نێوان هەولێر و بەغداد یەكلادەكرێنەوە
پەیام
وەزیری دەرەوەی عێراق دەڵێت لە ماوەی سێ ڕۆژدا بڕیاری كۆتایی بۆ یەكلاكردنەوەی گرفتەكانی نێوان هەولێر و بەغداد لەسەر نەوت و داهاتی نانەوتی دەدرێت.
لە لێدوانێكی ڕۆژنامەوانییدا، فوئاد حسێن وەزیری دەرەوە و جێگری سەرۆكوەزیرانی عێراق لەبارەی گفتوگۆكانی نێوان هەولێر و بەغدادەوە ڕایگەیاند: پێشكەوتنی بەرچاو لەبارەی دۆسیەی داهاتە نانەوتییەكانی هەرێمی كوردستانەوە ڕوویداوە و ئەگەری گەیشتن بە تێگەیشتن لەم چەند ڕۆژەدا هەیە.
لەبارەی دۆسیەی نەوتیشەوە، وەزیری دەرەوەی عێراق وتی: كێشەكە لەنێوان حكومەتی فیدڕاڵی و كۆمپانیا نەوتییەكان، یاخود حكومەتی هەرێم و كۆمپانیاكاندا نەبووە، بەڵكو كیشەكە سێلایەنەیە و لە چەند ڕۆژێكی كەمدا چارەسەری ئەو دۆسیە دەكرێت.
ئەو بەرپرسە پارتییەی حكومەتی فیدڕاڵ پێشبینیشی كرد، لە ماوەی سێ ڕۆژی داهاتوودا لیژنە حكومییەكان كارەكانیان تەواو بكەن بە ئامانجی پێشكەشكردنی ڕاپۆرتی ئەرێنی بە حكومەت بۆ ئەوەی لە ئەنجوومەنی وەزیران بخرێتە ڕوو و بڕیاری كۆتاییان لەم سێ ڕۆژەدا لەبارەوە بدرێت.
لای خۆیەوە، عەلی نزار سەرۆكی كۆمپانیای بەبازاڕكردنی نەوتی عێراق سۆمۆ ڕایگەیاند: دەستپێكردنەوە بە هەناردەی نەوتی هەرێمی كوردستان لەسەر كۆمپانیاكانی بەرهەمهێنان وەستاوە.
لە تۆڕە کۆمەڵایەتیەکان شەیری بکە