15 کاتژمێر پێش ئێستا
111 جار خوێنراوەتەوە
پڕۆژەی نیشتەجێبوونی جوولەكەنشین لەسەر خاكی فەڵەستین فراوانتر دەکرێت
پەیام
سەرۆكوەزیرانی زایۆنی پرۆژەی نیشتەجێبوونی ئی یەكی پەسەندكرد كە قودس و كەناری خۆراوا لەیەكتر دادەبڕێت و دروستكردنی پڕۆژەی نیشتەجێبوون و كۆمەڵگەی جوولەكەنشین لەسەر خاكی فەڵەستینی داگیركراو فراوان دەكات.
لەمیانەی سەردانیدا بۆ كۆمەڵگەیەكی جوولەكەنشین لە كەناری خۆراوای داگیركراو، بنیامین نەتەنیاهوو ڕایگەیاند، هەزاران یەكەی نیشتەجێبوونی دیكە لەم پڕۆژەیە دروست دەكەین و ڕێگا نادەین دەوڵەتی فەڵەستینی لێرە دروست بكرێت.
بنیامین نەتەنیاهوو جەختی كردەوە، سنووری قەوارەی زایۆنی كە بە دەوڵەتی ئیسڕائیل ناوی هێنا، كەناری خۆراوا نابێت بەڵكو لەسەر سنووری ئەردەن دەبێت. ڕاشیگەیاند: بەردەوام دەبن لە جەنگی غەززە تاكو بزووتنەوەی حەماس بە تەواوی دەبەزێنن.
ئەو پرۆژە نوێیەی نەتەنیاهوو واژووی كرد، ناوی (ئی 1) ـە و ئامانجیەتی شاری قودس ببەستێتەوە بە پرۆژە نیشتەجێیەكانی جوولەكەكان لە كەناری خۆراوا، بەمجۆرە كەناری خۆراوای داگیركراو و قودس لەیەكتر دادەبڕێت و نەخشەی دیمۆگرافیی ناوچەكە دەگۆڕێت. ئەمەش دەوڵەتی فەڵەستینیی چاوەڕوانكراو پارچەپارچە دەبێت و خاكەكەی لە یەكتر دادەبڕێت.
لە بەرانبەردا حسێن ئەلشێخ، جێگری سەرۆكی دەسەڵاتدارێتیی فەڵەستین ڕایگەیاند: ئەوەی پێی خۆشە و ئەوەشی پێی ناخۆشە با بزانن، دەوڵەتی فەڵەستین لەڕێگەیە. ڕاشیگەیاند: نە پرۆژەی ئی 1 و نە هیچ ڕێكارێكی دیكە ناتوانن ببنە بەربەست لەبەردەم گەلی فەڵەستین بۆ گەیشتنە بە ئامانجەكانیان.
لە تۆڕە کۆمەڵایەتیەکان شەیری بکە