2 کاتژمێر پێش ئێستا
79 جار خوێنراوەتەوە
موعین كازمی: هەرێم لە قەیران و ناخۆشییەكانی خەڵکەکەى بەرپرسیارە، نەک بەغدا
پەیام
موعین كازمی ئەندامی لیژنەی دارایی لە ئەنجومەنی نوێنەرانی عێراق ڕایگەیاند: دەسەڵاتی هەرێمی كوردستان بەشێوەیەكی شەفاف مامەڵە ناكات و بەرپرسیارە لە دۆخی خراپی خەڵكی هەرێمی كوردستان، نەک بەغدا.
كازمی لە گفتوگۆیەكدا لەگەڵ میدیایەكی نێوخۆیی ڕایگەیاند: بەپێی هەمواری یاسای بودجەی 2023، مەرجە كە ڕۆژانە 400 هەزار بەرمیل نەوتی هەرێم لەژێر چاودێریی سۆمۆ هەناردە بكرێت، هەروەها داهاتی نانەوتیی خاڵەسنوورییەكان و ڕسومات و هی دیكەیش ڕادەستی گەنجینەی وەزارەتی دارایی فیدڕاڵ بكات.
بە وتەی ئەو ئەندامەی لیژنەی دارایی "كۆی گشتی داهاتە نانەوتییەكانی هەرێم ساڵانە بە چوار تریلیۆن و 700 ملیار دینار مەزەندە دەكرێت، ئەوەش بەپێی ئەو زانیاریانەی لەلایەن دیوانی چاودێری هەرێمەوە پێشكەشكراوە، داهاتی نەوتی تەنكەر و قاچاخیش بەپیی خەمڵاندنەكانی وەزارەتی نەوتی فیدڕاڵ ساڵانە چوار تریلیۆن و 800 ملیار دینارە، بەڵام هەرێم بە ڕادەستكردنی داهاتەكان و نەوت پابەند نەبووە كەمێكی زۆر كەم نەبێت".
ئەندامەكەی ئەنجومەنی نوێنەرانی عێراق ڕوونیشیكردەوە "هەڵمەتێكی ڕاگەیاندن لە كوردستاندا هەیە كە بەغداد بە بەرپرسیار لە قەیران و ناخۆشییەكانی خەڵكی هەرێم دەزانێت، بەڵام لە ڕاستیدا حكومەتی هەرێم خۆی لە دروستكردنی ئەو دۆخە بەرپرسیارە، بەهۆی ئەوەی بە شێوەیەكی شەفاف مامەڵە لەگەڵ بەغدا ناكات".
كازمی دەشڵێت: پارتی نزیكبوونەوەی هەڵبژاردنەكان بۆ سەپاندنی مەرجەكانی بەسەر حكومەتی فیدراڵیدا سەبارەت بە دەستپێكردنەوەی هەناردەكردنی نەوت و دۆسیەكانی دیكە دەقۆزێتەوە.
لە تۆڕە کۆمەڵایەتیەکان شەیری بکە