ئیسپانیا سێیەم ڕێككەوتنی بۆ كڕینی چەك لەگەڵ قەوارەی ئیسرائیل هەڵوەشاندەوە

پەیام 

دوای چوونە بواری جێبەجێكردنی بڕیاری قەدەغەی بازرگانی لەگەڵ قەوارەی زایۆنی، ئیسپانیا سێیەم ڕێككەوتنی بۆ كڕینی چەك هەڵوەشاندەوە.

ڕۆژنامەی هائارێتسی زایۆنی بڵاویكردووەتەوە، كە ئیسپانیا ڕێككەوتنی سێیەمی بۆ كڕینی چەك لە قەوارەكەیان بە بڕی 207 ملیۆن یۆرۆ هەڵوەشاندووەتەوە، ئەوەیش دوای دوو ڕۆژ لە چوونە بواری جێبەجێكردنی بڕیاری قەدەغەكردنی بازرگانی لەگەڵ قەوارەی زایۆنی، كە لە چوارچێوەی جەنگی سەر كەرتی غەززەدا هەڵیناوە.
ڕۆژنامەكە دەڵێت ڕێككەوتنەكە لەگەڵ كۆمپانیای ڕافائیلی زایۆنی بووە و بۆ كڕینی 45 كۆنتێتەر ئامێری سەربازی بووە كە لەبواری چالاكی ئاسمانیدا بەكار دەهێنرێت و لە هەستەوەریی ئەلیكترۆنی بینایی و ئاماژە لێزەرییەكان و هەستەوەرەكانی تیشكی ژێرسوور و مۆدێلێكی نوێی لە ڕاداری پیشكەوتوو بۆ ڕووپێوی و وێنەگرتن بە كوالیتی بەرز پێك دەهاتن.

حكومەتی ئیسپانیا پێشتریش گرێبەستێكی بە بڕی 700 ملیۆن یۆرۆی بۆ كڕینی هاوەنی مووشەك و گرێبەستێكی دیكەی بە بڕی 287,5 ملیۆن یۆرۆی بۆ كڕنی مووشەكی دژەدرع لەگەڵ قەوارەی زایۆنی هەڵوەشاندبووەوە، ئەوەیش دوای ئەوەی كە ڕۆژی سێشەممەی ڕابردوو مەرسومێكی پاشایەتی لەلایەن حكومەتی وڵاتەكەوە پەسەند كرا بۆ قەدەغەكردنی  بازرگانی لەگەڵ قەوارەكە و ڕێگەنەدان بە بەكارهێنانی بەندەرە ئاوییەكانی.