سلۆڤینیا گەشتی سەرۆكوەزیرانی ئیسرائیل و چوونی بۆ ناو وڵاتەكەی قەدەغە كرد

پەیام 

فڕۆكەكەی سەرۆكی قەوارەی زایۆنی لە ترسی دەستگیركردنی بەسەر ئاسمانی ئەوروپا نەیتوانی بفڕێت و حكومەتی سلۆڤینیاش هاتنی نەتەنیاهووی بۆ وڵاتەكەی قەدەغە كرد.

نیڤا گراسیچ، وەزیری دەوڵەت لە وەزارەتی دەرەوە و كاروباری ئەوروپا لە سلۆڤینیا، دوای دانیشتنی حكومەت ڕوونیكردەوە، خەڵك ئاگادارن كە ڕێوشوێن دژی ناتانیاهۆ گیراوەتەبەر بەهۆی ئەنجامدانی تاوانی جەنگ و تاوان دژی مرۆڤایەتی.

ئاماژەی بەوەشكرد، دادگای دادی نێودەوڵەتی لە 19ی تەمموزی ساڵی ڕابردوو گەیشتە ئەو دەرەنجامەی، كە چەندین سیاسەت و كردەوەكانی ئیسرائیل پێشێلی یاسای مرۆیی نێودەوڵەتی و یاسای مافەكانی مرۆڤ دەكەن، بۆیە سلۆڤینیا، پابەندە بە بڕیارەكانی دادگای نێودەوڵەتی.

هەروەها دووپاتیشیكردەوە كە لیژنەی لێكۆڵینەوەی سەربەخۆ سەر بە ئەنجومەنی مافەكانی مرۆڤی نەتەوە یەكگرتووەكان، لە ڕاپۆرتەكەی دەربارەی ڕووداوەكانی غەززە لە 16ی ئەیلولی 2025، گەیشتە ئەو دەرەنجامەی كە ئیسرائیل كۆمەڵكوژی دژی فەلەستینییەكان ئەنجام دەدات.

زانیارییەكان ئاماژە بەوە دەكەن، كە سەرۆكوەزیرانی قەوارەی زایۆنی ڕێڕەوێكی درێژتری گرتووەتەبەر بۆ ئەوەی لە كاتی گەشتەكەیدا بۆ نیویۆرك، دوور بكەوێتەوە لە ئاسمانی ئەوروپا، بەتایبەتی فەرەنسا.

هەروەها فڕۆكەكەی نەتەنیاهو ڕێڕەوەكەی گۆڕیوە بەناو دەریای ناوەڕاست و زەریای ئەتڵەسیدا، تەنها بە ماوەیەكی كەم بەسەر یۆنان و ئیتاڵیادا تێپەڕیوە.