بەمەبەستى پاڵپشتیكردنی بەپەلەی دارایی بۆ فەڵەستین 12 وڵات هاوپەیمانێتییەكیان ڕاگەیاند

پەیام 

بەهۆی خراپتربوونی دۆخی ژیانی دانیشتووانی كەناری خۆراوا و لاوازبوونی زیاتری دارایی دەسەڵاتدرێتیی فەڵەستین، ژمارەیەك وڵاتی ئەورووپی و عەرەبی، هاوپەیمانێتییەكی هاوكاری دارایی بەپەلەیان پێكهێنا.

فەڕەنسا، بەلجیكا، بەریتانیا، دانیمارك، ئیرلەندا، ئایسلەندا، ئیسپانیا، نەرویج، سلوڤینیا، سویسرا، یابان لەگەڵ سعودییە، لەسەر پێكهێنانی هاوپەیمانێتییەكی دارایی بۆ فەڵەستین پێكهاتوون.

بەپێی زانیارییەكان، تەنیا بۆ كەناری خۆراوا 170 ملیۆن دۆلار لەلایەن هاوپەیمانێتییەكەوە دابینكراوە، ئەوەش بە مەبەستی دروستكردنی دۆخێكی دارایی جێگیر بۆ دەسەڵاتدارێتیی فەڵەستین.

سەرەڕای پێشكەشكردنی هاوكاری ماددی، هەروەها ئەو وڵاتانە جەختیان لە چارەسەری دوودەوڵەتی كردووەتەوە.

وەزارەتی دەرەوەی ئیسپانیا هۆكاری پێكهێنانی ئەو هاوپەیمانێتییە خێرا و بەپەلە داراییەی بۆ ئەوە گەڕاندەوە كە دەسەڵاتدارێتی كەناری خۆراوا ڕووبەڕووی ئاڵنگاری یەكجار زۆر بووەتەوە، بەشێوەیەك لە ڕابردوودا هاوشێوەی نەبووە.

لای خۆشیەوە وەزیری دەرەوەی سعودییە ئاشكرای كرد، وڵاتەكەی بە بەخشینی 90 ملیۆن دۆلار بەشداری لەو هاوكارییە نێودەوڵەتییە بۆ فەڵەستین كردووە.