جەنگی سەر غەززە 723 ڕۆژە بەردەوامە و سوپای زایۆنی بەردەوامە لە كۆمەڵكوژی

پەیام

723 ڕۆژ بەسەر جەنگی سەر كەرتی غەززەدا تێدەپەڕێت و سوپای زایۆنییش لە ئەنجامدانی كۆمەڵكوژی دژی هاووڵاتیانی كەرتەكە بەردەوامە.

سەرچاوەكانی تەندروستی لە كەرتی غەززە ئاشكرایان كرد "تەنیا ئەمڕۆ بەهۆی تەقە و بۆردومانی سوپای زایۆنی 24 هاووڵاتی فەڵەستینی شەهید بوون، لە بەیانی دوێنێ، ڕۆژی شەممەشەوە 91 كەس شەهید بوون، لەنێویاندا 48یان لە شاری غەززە بوون و شەشیان لەو كەسانە بوون كە نۆرەیان بۆ وەرگرتنی هاوكارییە مرۆییەكان گرتبوو".

بەپێی ئامارەكانیش، تائێستا ژمارەی شەهیدەكان بەگشتی 65 هەزار و 926 كەسی تێپەڕاندووە و ژمارەی بریندارەكانیش 167 هەزار و 783 كەسی تێپەڕاندووە.

هاوكات سوپای زایۆنی لە هێرش و چوونە نێو شاری غەززە و وێرانكردن و خاپووركردنی باڵەخانەكانی بەردەوامە، بەهۆی بەردەوامیی هێرشەكانیشەوە تائێستا زیاتر لە 750 هەزار كەس شارەكەیان بەجێهێشتووە، بەڵام زۆرێك لە هاووڵاتیان شارەكە ڕەتی دەكەنەوە ناوچەكانیان جێبهێڵن.