قەوارەی زایۆنی ئامادە نییە تەرمی شەهید (یەحیا سنوار) و (محەمەد)ی برا ئازاد بكات

پەیام

سەرەڕای ئەوەی ئەمریكا و نێوەندگیرەكان ڕێككەوتنی غەززەیان ڕاگەیاند بەڵام قەوارەی زایۆنی ئەمشەو لەبارەی پرسەكەوە كۆدەبێتەوە.

بڕیارە ئەمشەو كابینەی بچووكراوەی ئەمنیی حكومەتی زایۆنی كۆببێتەوە و بڕیار لەبارەی خاڵەكانی قۆناغی یەكەمی ڕێككەوتنی ئاگربەست و ئاڵوگۆڕی دیلەكان بدات. هەروەها دانوستانەكانی شەرەم شێخ لە میسڕ بەردەوامن لبارەی بەشێك لە وردەكارییەكانی ڕێككەوتنەكەوە.

تا ئێستا وردەكاریی لەبارەی ئەو لیستەی دیلەكان كە حەماس پێشكەشی كردووە و داوای ئازادكردنی كردوون ڕانەگەیەنراوە، دەستەی زیندانەكانی قەوارەی زایۆنییش ڕایگەیاندووە: تا ئێستا ناوی ئەو كەسانەیان بەدەست نەگەیشتووە كە دەبێ ئازادیان بكات.

هەروەها وتەبیژی حكومەتی قەوارەی زایۆنی ڕایگەیاندووە: مەروان بەرغووسی، سەركردەی دیاری بزووتنەوەی فەتح كە لەلایەن حەماسەوە داوای ئازادكردنی كراوە، لەم ڕێككەوتنەدا ئازاد ناكرێت.

هەروەها میدیای فەرمیی قەوارەی زایۆنی باسیان لەوە كردووە قەوارەكە ئامادە نییە تەرمی شەهید یەحیا سنوار، سەركردەی تیرۆركراوی حەماس و محەمەد سنوواری برای ڕادەست بكاتەوە.

ئەمە لەكاتێكدایە زۆرینەی میدیاكان باسیان لەوە كردووە چاوەڕێ دەكرێت دووشەممەی داهاتوو بزووتنەوەی حەماس سەرجەم دیلە زیندووەكان ئازاد بكات و سبەی هەینییش سوپای داگیركەر دەست بە كشانەوە لە خاكی غەززە بكات.