05/06/2026
218 جار خوێنراوەتەوە
عومان ئاساییبوونوەی كارەكانی بەندەری فەحلی ڕاگەیاند
پەیام
دوای چەند كاتژمێرێك لە بەئامانجگیرانی دەسەڵاتدارانی عومان ئاساییبوونوەی كارەكانی بەندەری فەحلیان ڕاگەیاند و تا ئێستایش هۆكاری تەقینەوەكە ئاشكرا نەكراوە.
بەندەری "فەحل"، كە وێستگەی سەرەكیی هەناردەكردنی نەوتی خاوی سوڵتاننشینی عومانە، بەرەبەیانی ئەمڕۆ بەهۆی تەقینەوەیەكەوە تووشی پەككەوتن بووە و بەپێی ژمارەیەك سەرچاوەی میدیایی تەقینەوەكە لە وێستگەی هەناردەكردنی بەندەركە لە نزیك مەسقەتی پایتەخت ڕووی داوە و هۆكارەكەیشی بۆ هێرشی درۆنی گەڕێنراوەتەوە بەڵام تا ئێستا پشتڕاست نەكراوەتەوە.
لایخۆیانەوە بازرگانانی نەوت ڕایانگیاندووە كە ئەو بارە نەوتانەی بڕیار بوو لەم ڕۆژانەدا ڕەوانە بكرێن، بەهۆی كاریگەریی تەقینەوەكەوە بۆ چەند ڕۆژێك دواخراون.
كۆمپانیای گەشەپێدانی نەوتی عومان (PDO) كە بەرپرسی فەرمی بەرهەمهێنان و باركردنی نەوت لە وڵاتەكە دوای چەند كاتژمێرێك لە ڕوداوەكە ئاساییبوونەوەی دۆخەكەی لە بەندەری فەحل ڕایگەیاند و جەختی كردەوە كە كارەكان بەشێوەی ئاسایی بەردەوامە، بەڵام تا ئێستا هیچ لێدوانێكی فەرمی لەسەر هۆكار و قەبارەی زیانەكانی تەقینەوەكە نەداوە.
ئەم بەندەرە ستراتیژییە دەكەوێتە دەرەوەی گەرووی هورمز و یەكێكە لەو خاڵە كەم و گرنگانەی باركردنی نەوت لە ڕۆژهەڵاتی ناوەڕاست كە لە كاتی جەنگە هەرێمییەكاندا بە چالاكی مابووەوە.
لە مانگی ڕابردووەوە ئەم بەندەرە قەرەباڵغییەكی زۆری كەشتییەكانی تێدا بینراوە و پێشتریش لە مانگی ئازاردا ڕووبەڕووی هێرش بووەوە، بەڵام ئەمجارە زیانەكان بوونەتە هۆی ڕاگرتنی پڕۆسەی باركردن بۆ ماوەی چەند ڕۆژێك، ئەمەش كاریگەری لەسەر خشتەی دابینكردنی وزە دروست دەكات.
لە تۆڕە کۆمەڵایەتیەکان شەیری بکە