ئه‌مریكا زنجیره‌یه‌كی دیكه‌ی هێرشی كرده‌ سه‌ر پێگه‌كانی ئێران

په‌یام
واشنتن زنجیرەیەکی نوێی ھێرشی ئاسمانی بۆ سەر بنکە سەربازییەکانی ئێران ئەنجامدا، بەمەش بۆ دوازدەھەمین شەوی لەسەرەیەک ئامانجە دەریایی، مووشەکی و فڕۆکە بێفڕۆکەوانەکانی ئەو وڵاتەی بۆردومان کرد و دوو کوژراوی لێکەوتەوە.

بەپێی ڕاگەیەندراوێکی فەرماندەیی ناوەندیی ھێزەکانی ئەمریکا (سێنتکۆم)، لەسەر فەرمانی سەرۆک دۆناڵد ترەمپ، بەرەبەیانی ئەمڕۆ پێنجشەممە جەولەیەکی دیکەی ھێرشەکان بەئامانجگرتنی ژێرخانی سەربازیی ئێران بەڕێوەچوو. ھێرشەکان بەشێوەیەکی تایبەت تواناکانی ھێزی دەریایی، کۆگاکانی ھەڵگرتنی مووشەک و بەلەم و فڕۆکە بێفڕۆکەوانەکانیان لەناوەوەی خاکی ئێراندا کردووەتە ئامانج.

ئەم کارەساتە سەربازییانە بەشێکە لە ھەڵمەتێکی بەرفراوانتر کە بەدرێژایی مانگی تەمووز دەیان پێگەی سەربازی لە ناوەوەی ئێراندا کردووەتە ئامانج. ھاوکات لەگەڵ ئەم ھێرشە ئاسمانییانەدا، ئەمریکا گەمارۆی دەریایی بۆ سەر بەندەرەکانی ئێران دەستپێکردووەتەوە بەمەبەستی ڕێگریکردن لە ھاتنەژوورەوە و چوونەدەرەوەی کەشتییەکان.

لە چوارچێوەی جێبەجێکردنی ئەم گەمارۆ دەریاییەدا، ھێزەکانی ئەمریکا ڕایانگەەیاندووە تاوەکو ئێستا ڕێڕەوی ھەشت کەشتیی بازرگانییان گۆڕیوە و دەستیان بەسەر کەشتییەکی دیکەدا گرتووە، بەمەبەستی پەکخستنی جووڵەی دەریایی و ڕێگریکردن لە بەکارھێنانی بەندەرە ئێرانییەکان.