لە ڕۆژی هەڵبژاردن هیچ قەدەغەیەكی هاتوچۆ ڕاناگەیەنرێت

پەیام

لە ڕۆژی هەڵبژاردنی ئەندامانی ئەنجوومەنی نوێنەرانی عێراقدا هیچ قەدەغەیەكی هاتوچۆ ڕاناگەیەنرێت.

لە میانی وتەیەكیدا لە سەرۆكایەتی كۆبوونەوەی لیژنەی ئەمنیی باڵای پاراستنی هەڵبژاردن، محەمەد شیاع سودانی سەرۆكوەزیرانی عێراق ڕایگەیاند: هیچ قەدەیەكی هاتوچۆ لە ڕۆژی دەنگدانی گشتی بۆ هەڵبژاردنی ئەنجوومەنی نوێنەران لە 11ی مانگدا ڕاناگەیەنرێت.

بەپێی ئەوەی نووسینگەی ڕأگەیاندنی سەرۆكوەزیرانی عێراق بڵاوی كردووەتەوە، سوودانی ئاماژەی بەوە كردووە، دەبێت ڕۆژی هەڵبژاردن ڕەوتی جوڵە و ئازادی هاتوچۆ و گواستنەوە هەبێت".

سوودانی سەركەوتنی حكومەتەكەی بۆ بەڕێوەبردنی هەڵبژاردن لە وادەی خۆیدا وەك پلانی بۆ دانرابوو، بە ڕووداوێكی گرنگ ناوزەد كرد.

ڕۆژی چوارشەممەی ڕابردووش وەزارەتی ناوخۆی عێراق ڕایگەیاند: لە ڕۆژی هەڵبژاردندا هیچ ڕێبەستن و قەدەغەیەكی هاتوچۆ پەیڕەو ناكرێت.

جێبەجێنەكردنی قەدەغەی هاتوچۆ لە ڕۆژی هەڵبژاردنی ئەمساڵدا لەكاتێكدایە لە هەڵبژاردنەكانی 2014 و 2018 بەهۆی دۆخی ئەمنییەوە قەدەغەی هاتوچۆ سەپێنرا و لە 2021یش دەروازە سنوورەكان و فڕۆكەخانەكان داخران و ڕێگە بە هاتوچۆی نێوان پارێزگاكانیش نەدرا.