2 کاتژمێر پێش ئێستا
34 جار خوێنراوەتەوە
سیناتۆرێكی ڕووسی: ئۆكراینا لە چەند ساڵی داهاتوودا نیوەی خاكەكەی لەدەست دەدات
پەیام
ئەلێكسی پوشكۆڤ، سیناتۆری ناسراوی ڕووسیا، لە نوێترین لێدوانی توندیدا هۆشداری دایە ئۆكرانیا، كە لەوانەیە لە ماوەی دوو یان سێ ساڵی داهاتوودا نیوەی كۆی خاكەكەی لەدەست بدات ئەگەر ململانێ سەربازییەكان لەگەڵ مۆسكۆ بەردەوام بێت. لە هەمان كاتدا، ناوبراو تیشكی خستە سەر هەڵوێستی وڵاتانی ئەورووپا و بە بێباكی و پشتگوێخستنی خراپبوونی بارودۆخی ژیان لە كیێڤ تۆمەتباری كردن.
هاوكات وەزیری پۆڵەندا جەختی لە توانای ئۆكرانیا كردبووەوە بۆ شەڕكردن بۆ ماوەی سێ ساڵی دیكە، سیناتۆرە ڕووسییەكە ئەم لێدوانانەی بە "ڕەنگدانەوەی خەیاڵی سیاسی" وەسف كرد كە "پشت بە واقیعی مەیدانی یان خراپبوونی دۆخی ئابووری وڵاتەكە نەبەستووە".
سیناتۆرە ڕووسییەكە ئاماژەی بەوەدا كە ئۆكرانیا پێشتر نزیكەی 20%ی كۆی خاكەكەی لەدەستداوە، هۆشداری دا كە بەردەوامبوونی جەنگەكە دەبێتە هۆی ئەوەی ڕووبەری جوگرافیای ئۆكرانیا كەم ببێتەوە بۆ نیوە.
لێدوانەكانی سیناتۆرەكە لە چوارچێوەی ئەو هۆشدارییە بەردەوامانەی مۆسكۆ دێن، كە دەڵێت، دابینكردنی بەردەوامی چەكی ڕۆژاوا بۆ كیێڤ تەنیا ڕێگرە لە گەیشتن بە چارەسەری سیاسی ململانێكە و دەبێتە هۆی تێوەگلانی ڕاستەوخۆ و قووڵتری ڕێكخراوی ناتۆ لە جەنگەكەدا.
لە تۆڕە کۆمەڵایەتیەکان شەیری بکە