بۆ كۆتاییهێنان بە جەنگی سەر غەززە، ڕووسیا ڕەشنووسێكی بە نەتەوە یەكگرتووەكان دا

پەیام

لە وەڵامی پرۆژەیەكی ئەمریكا بۆ كۆتاییهێنان بە جەنگی سەر كەرتی غەززە، ڕووسیا ڕەشنووسێكی پێشكەش بە نەتەوە یەگرتووەكان كرد.

ئاژانسی هەواڵی ڕۆیتەرز بڵاویكردووەتەوە، كە لە وەڵامی پرۆژە بڕیارێكی ئەمریكا لە ئەنجوومەنی ئاسایشی نێودەوڵەتی بۆ كۆتاییهێنان بە جەنگی سەر كەرتی غەززە، كە هەریەك لە مۆسكۆ و پەكین و وڵاتانی عەرەبی دژی وەستانەوە، نێردەی ڕووسیا لە نەتەوە یەكگرتووەكان ڕەشنووسێكی پێشكەش بە ڕێكخراوەكە كردووە.
نیردەی ڕووسیا لە ڕەشنووسەكەدا دەڵێت ئامانجەكە ئەوەیە، كە ئەنجوومەنی ئاسایش بتوانێت شێوازێكی هاوسەنگ و قبوڵكراو و یەكگرتوو بۆ گەیشتن بە كۆتایی جەنگەكان بگرێتەبەر.

ڕەشنووسەكەی ڕووسیا داوا دەكات ئەمینداری گشتی نەتەوە یەكگرتووەكان بژاردەى نێودەوڵەتی بۆ بەدەستهێنانی سەقامگیری لە غەززە بخاتە ڕوو، هەروەها باس لە ئەنجوومەنی ئاشتی نەكات كە ئەمریكا پیشنیازی كردووە بۆ بەڕێوەبردنی قۆناغی ڕاگوزەری كەرتی غەززە لە ڕێگەیەوە.

ئەمە لەكاتێكدایە كە نوێنەری ئەمریكا لە نەتەوە یەكگرتووەكان داوای لە ئەنجوومەنی ئاسایش كردووە، كە ڕەزامەندی لە سەر پرۆژە بڕیارەكەی وڵاتەكەی لەو ڕووە بدات، بەپێچەوانەوە فەڵەستنییەكان ڕووبەڕووى مەترسیی زیاتر دەبنەوە.

ئاماژەی بەوەیش كرد ئاگربەستەكە ناسكە و داوا لە ئەنجوومەنەكە دەكەین یەكبگرێت و هەنگاو بنێت و بەدەستهێنانی ئاشتی كە زۆر پێویستە.