کیم جۆنگ ئوون بە سەردانێکی نهێنی گەیشتە شارێکی سنووریی چین

میدیا نێودەوڵەتییەکان ئاشکرایان کرد کە کیم جۆنگ ئوون، سەرکردەی کۆریای باکوور بە سەردانێکی ڕانەگەیەندراو گەیشتووەتە شارێکی سنووریی چین بە مەبەستی پتەوکردنی هەماهەنگییە سیاسییەکان. 
بەپێی زانیارییەکانی ئاژانسی فرانس پرێس، کیم جۆنگ ئوون، سەرکردەی کۆریای باکوور لە هەنگاوێکی کتوپڕدا سەردانی شارێکی نزیک لە سنووری هاوبەشی هەردوو وڵاتی لە خاکی چیندا کردووە، لە کاتێکدا پیۆنگ یانگ و پەکین ئاستی هاوئاهەنگییە دیپلۆماسی و ئەمنییەکانیان لە ناوچەکەدا بەرزکردووەتەوە. وێڕای ئەوەی وردەکاریی کۆبوونەوەکان و کەسایەتییە بەشداربووەکان بە فەرمی ڕانەگەیەندراون، بەڵام گومان دەکرێت سەردانەکە تایبەت بێت بە پەرەپێدانی ئاڵۆگۆڕی بازرگانی و گۆڕانکارییە ئەمنییەکانی نیمچەدوورگەی کۆریا. 
ئەم جموجووڵەی نێوان هەردوو دەوڵەت بایەخێکی گەورەی هەیە، بەتایبەت بەهۆی کاریگەریی پێگەی پەکین لەسەر دۆسیەی ئەتۆمیی کۆریای باکوور و کەمکردنەوەی فشارەکانی سزای نێودەوڵەتی بەسەر پیۆنگ یانگدا. ئەم سەردانە چاوەڕواننەکراوە لە کاتێکدایە کە ململانێ هاوکێشە سیاسییەکانی ناوچەکە لە ڕۆژهەڵاتی ئاسیادا لە هەڵکشاندایە، و هەردوو وڵات هەوڵ دەدەن لە ڕێگەی هاوپەیمانێتییە مێژووییەکەیانەوە هاوسەنگیی هێز لەبەرانبەر واشنتن و هاوپەیمانە هەرێمییەکانیدا بپارێزن.