2 کاتژمێر پێش ئێستا
24 جار خوێنراوەتەوە
ئێران هێشتا وەڵامى عەلى زەیدى بۆ پاراستنی نەوتی عێراق نەداوەتەوە
پەیام
سەرۆكوەزیرانی عێراق داوای لە ئێران كردووە گەرەنتی تێپەڕبوونی نەوتهەڵگرەكانی وڵاتەكەی لە گەرووی هورمزدا بكات و تارانیش هیشتا وەڵامی نەداوەتەوە.
كەناڵی "الحرە"ی ئەمریكی لە زاری سەرچاوەكانییەوە بڵاوی كردەوە كە عەلی زەیدی سەرۆكوەزیرانی عێراق لە سەردانەكەیدا بۆ تاران داوای لە بەرپرسانی ئێران كردووە گەرەنتی پاراستنی تێپەڕبوونی نەوتی عێراق بە گەرووی هورمزدا بكەن، بەڵام بەپێی زانیاری كەناڵە ئەمریكییەكە تاران وەڵامێكی ڕوونی بەو داوایەی عێراق نەداوەتەوە، بەڵام كەناڵەكە لە هەواڵەكەیدا دەڵێت: پێشبینی دەكرێت بەهۆی ڕێككەوتنەكانی ئەمدواییەی زەیدی لەگەڵ واشنتۆن و كۆمپانیا ئەمریكییەكان، هەڵوێستی ئێران نەرێنی بێت.
عێراق بۆ دابینكردنی 90 لە سەدی داهاتەكەی پشت بە هەناردەی نەوت دەبەستێت كە زۆربەیشی بەو گەرووەدا تێدەپەڕێت، بەهۆی ئاڵۆزییەكان و هێرشەكانی ئێرانیشەوە هەناردەی نەوتی عێراق لە 90 ملیۆن بەرمیلەوە بۆ تەنها 10 ملیۆن بەرمیل لە مانگێكدا دابەزیوە.
سەردانەكەی زەیدی بۆ تاران دوای كۆبوونەوەی بوو لەگەڵ دۆناڵد ترەمپ كە تێیدا هاوبەشییەكی ستراتیژییان ڕاگەیاند.
لەئێستادا بەهۆی مەترسییەكانەوە، جموجۆڵی كەشتییەكان لە گەرووی هورمز بۆ نزمترین ئاست دابەزیوە، بەجۆرێك ڕۆژی پێنجشەممەی هەفتەی ڕابردوو تەنها یەك نەوتهەڵگر بە گەرووەكەدا تێپەڕ بووە، ئەمەش كاریگەری ڕاستەوخۆی لەسەر ژیانی هاووڵاتیانی عێراق دروست كردووە.
لە تۆڕە کۆمەڵایەتیەکان شەیری بکە