ئەمڕۆ دواوادەی خۆپاڵاوتنە بۆ پۆستی سەرۆككۆمار و تائێستا 41 كەس خۆیان پاڵاوتووە

پەیام 

ژمارەی پاڵێوراوان بۆ پۆستی سەرۆككۆماری عێراق 40 كەسی تێپەڕاند و ئەمڕۆش دواین وادەیە بۆ وەرگرتنی ناوی پاڵێوراوەكان.

تا كۆتایی دەوامی فەڕمی دوێنێ یەكشەممە، 41 كەس بە فەڕمی داواكاریی خۆپاڵاوتنیان بۆ پۆستی سەرۆككۆماری عێراق پێشكەش كرد. 

بڕیارە بە كۆتاییهاتنی كاتی دەوامی ئەمڕۆ دووشەممە، پێنجی كانوونی دووەمی 2026، دەرگای خۆپاڵاوتن دابخرێت، بەگوێرەی دەستووریش دەبێت ئەنجوومەنی نوێنەران لە ماوەی 30 ڕۆژ دوای یەكەم دانیشتنی خولی نوێ، سەرۆكێك بۆ وڵات هەڵبژێرێت.

بەشێك لە پاڵێوراوەكان كوردن و لە نێویاندا سەر بە حزب و لایەنەكان و سەربەخۆ هەن، هەروەها سێ كەسی یەكێتییش كە بریتین لە (لەتیف ڕەشید، نزار ئامێدی و خالید شوانی) لە ڕیزی ئەو پاڵێوراوانەدان، كەسانێكیش لەنێو پاڵێوراوەكاندان كە پێشتر یەكێتی بوون، یان ئێستاش لەسەر یەكێتیی حسابن، بەڵام وەك سەربەخۆ فۆڕمی خۆپاڵاوتنیان پڕ كردووەتەوە. هەرچی پارتییشە تا ئێستا هیچ كەسێكی نەپاڵاوتووە و پشتیوانیی لە هیچ پاڵێوراوێكیش نەكردووە.

بەپێی نەریتی باو لە دوای ساڵی 2003ـەوە پۆستی سەرۆككۆمار بۆ كوردە و تائێستاش لە سەرجەم خولەكاندا كەسایەتییەكی یەكێتی ئەو پۆستەی بەڕێوە بردووە.