05/01/2026
291 جار خوێنراوەتەوە
ئەمڕۆ لە دووەم دانیشتنی پەرلەمانی عێراقدا لیژنەكانی پەرلەمان پێکدەهێنرێت
پەیام
ئەمڕۆ ئەنجومەنی نوێنەرانی عێراق دووەم دانیشتنی لە خولی نوێدا ئەنجام دەدات و، بە پێی كارنامەی دانیشتنەكەش پەسەندكردن پەیڕەوی ناوخۆ و لیژنە هەمیشییەكان تاوتوێ دەكرێن.
بەپێی مادەی 69ـی پەیڕەوی ناوخۆی ئەنجومەنی نوێنەرانی عێراق پێویستە دوای پەسەندكردنی پەیڕەوی ناوخۆی ئەنجوومەنەكە كە ئەمڕۆ ئەنجام دەدرێت، دەنگ لەسەر پێكهێنانی لیژنەكانی پەرلەمان بدرێت.
بەپێی ئەو كارنامەیەی كە لە لایەن ئەنجومەنی نوێنەرانەوە بڵاو كراوەتەوە، ئەنجوومەنەكە ئەمڕۆ پەیڕەوی ناوخۆ پەسەند دەكات و دواتریش دەست دەكات بە پێكهێنانی لیژنە هەمیشییەكان.
بەپێی پەیڕەوی ناوخۆ لیژنەكان لە حەوت ئەندام تاكو 15 ئەندامیان دەبێت و، بەپێی پسپۆڕی و لێهاتوویی ئەندامەكانی هەڵدەبژێردرێن، داوتریش لەلایەن لیژنەكانەوە دەنگ لەسەر هەڵبژاردنی سەرۆك و جێگر و بڕیاردەری لیژنەكان دەدرێت.
بەپێی بەركەوتەی كارپێكراوی خولەكانی ڕابردووی ئەنجوومەنی نوێنەرانی عێراق بەركەوتەی كورد لە سەرۆكایەتی لیژنەكاندا تەنها سێ لیژنە بووە، بەڵام ئەندامی لە زۆرینەی لیژنەكاندا دەبێت.
لە تۆڕە کۆمەڵایەتیەکان شەیری بکە