شەڕ لە حەلەب چڕ دەبێتەوە و هۆشداری لە كارەساتی مرۆیی دەدرێت

پەیام

هێزەكانی ئاسایشی ناوخۆی حەلەب ڕایگەیاند، هێرشێكی زەمینیی بەرفراوانی هێزەكانی حكومەتی دیمەشقیان بۆ سەر گەڕەكەكانی شێخ مەقسود و ئەشرەفیە تێكشكاندووە.

بەپێی ڕاگەیەندراوی ئاسایشی حەلەب، هێرشەكە بە بەشداریی دەیان تانك و زرێپۆش ئەنجامدراوە، بەڵام لە ئەنجامی وەڵامدانەوەكانیاندا تانكێك و پێنج ئۆتۆمبێلی سەربازی و حەوت درۆن تێكشكێنراون و زیانی گیانی بەر هێرشبەران كەوتووە.

هاوكات دۆخی مرۆیی شارەكە ڕوو لە خراپبوونە؛ بەرپرسانی تەندروستی هۆشداری لە روودانی كۆمەڵكوژی دەدەن و ئاماژە بەوە دەكەن تا ئێستا 65 هاوڵاتی مەدەنی بوونەتە قوربانی و نەخۆشخانەكان بێ دەرمانن.

بەهۆی بۆردومان و مۆڵەتی سوپای سوریاشەوە بۆ چۆڵكردنی ناوچەكە، شەپۆلێكی گەورەی ئاوارەبوون دەستیپێكردووە و هەزاران خێزان بێ حاڵ و ماڵ بوون.

سوپای سووریا ڕۆژی ڕابردوو مۆڵەتی كۆتایی بۆ سڤیلەكان دانا بۆ چۆڵكردنی ناوچەكە، ئەمەش وایكرد شەپۆلێكی ئاوارەبوون دەستپێبكات و تەنیا لە رۆژێكدا 20 هەزار خێزان روویان لە عەفرین كردەوە، بەڵام هێشتا سەدان هەزار كەس لەژێر گەمارۆدان.