ئیلهام ئەحمەد: هەسەدە دژی هۆزە عەرەبەكانی حەسەكە توندوتیژیی ئەنجامنەداوە

پەیام 

بەڕێوەبەرایەتیی خۆسەر ڕەتیدەكاتەوە كۆمەڵكوژی لە حەسەكە ئەنجام درابێت و دەڵێت: دەنگۆیەكی ناڕاستە.

دوای ڕاگەیاندنی ئاگربەستی سەرتاسەری لە نێوان حكومەتی سووریا و هێزەكانی سووریای دیموكرات "هەسەدە" بەشێك لە میدیا و گرووپەكانی سووریا باس لەوە دەكەن، هەسەدە دژی خەڵك و هۆزە عەرەبەكانی حەسەكە لە رۆژئاوای كوردستان كۆمەڵكوژیی كردووە و توندوتیژیی ئەنجام داوە.

لە بەرانبەردا ئیلهام ئەحمەد، بەرپرسی پەیوەندییەكانی دەرەوەی بەڕێوەبەرایەتیی خۆسەری باكوور و رۆژهەڵاتی سووریا ڕایگەیاند: سەرجەم ئەو ڕاپۆرتانەی بەشێك لە گرووپەكان باس لە كۆمەڵكوژی لە حەسەكە دەكەن، دوورن لە ڕاستیەوە و بە تەواوی هەڵبەستراون.

ئیلهام ئەحمەد ڕاشیگەیاندووە: ئەم چەواشەكارییانە لەلایەن گرووپە چەكدارەكانی سەر بە حكومەتی دیمەشق بەمەبەستی تێكدانی ئاگربەست و نانەوەی گرژیی عەشایەری و زەمینەسازی بۆ هێرشكردنە سەر حەسەكە و كۆبانێ بڵاو دەكرێنەوە بۆیە داوا لە هاووڵاتیان دەكەین لەوپەڕی وریاییدا بن و نەكەونە دوای دەنگۆكان.