موقاوەمە بانگەشەی خستنەخوارەوەی دوو فڕۆكەی ئەمریكی لە عێراق دەكات

پەیام 

بەرەی موقاوەمەی ئیسلامی لە عێراق ڕایگەیاند، لە ماوەی 24 كاتژمێردا دوو فڕۆكەی سوتەمەنیهەڵگری ئەمریكییان كردووەتە ئامانج و یەكێكیان خراوەتە خوارەوە، سوپای ئەمریكا بەئامانجگرتنی فڕۆكەكانی ڕەتكردووەتەوە، بەڵام هۆكاری كەوتنەخوارەوەیشی ئاشكرا نەكردووە.

بەرەی موقاوەمە لە ڕاگەیەندراوێكدا كە كاتژمێر 04:46 خولەكی بەیانیی ئەمڕۆ بڵاوی كردووەتەوە، دەڵێت "دووەم فڕۆكەی جۆری KC-135ـی سەر بە داگیركەری ئەمریكامان لە ڕۆژئاوای عێراق كردە ئامانج".

بەرەی موقاوەمە كە لە گرووپە چەكدارییەكانی لایەنگری ئێران پێك دێت، دەشڵێت "دوای پێكرانی فڕۆكەكە، تیمی فڕۆكەوانی توانییان پێی هەڵبێن و بە ناچاری لە یەكێك لە فڕۆكەخانەكانی دوژمندا نیشتەوە".

ئەمە لەكاتێكدایە هەر كاتژمێر 03:31 خولەكی بەرەبەیانی ئەمڕۆ، ئەو گرووپانە ڕایگەیاند، ئەو فڕۆكە KC-135ـەی ئەمریكا كە لە ڕۆژئاوای عێراق كەوتە خوارەوە، لەلایەن چەكدارانی ئەوانەوە "بە چەكی گونجاو" كراوەتە ئامانج.

بەڵام فەرماندەیی ناوەندیی هێزەكانی ئەمریكا (سێنتكۆم) كە خۆی كەوتنەخوارەوەی فڕۆكەكەی ڕاگەیاندبوو، ڕەتی كردەوە فڕۆكەكە كرابێتە ئامانج، هەروەها بەئامانجگیرانی فڕۆكەیەكی دیكەی هاوشێوەشی پێشتڕاست نەكردووەتەوە.

سوپای پاسدارانی ئێرانیش خستنەخوارەوەی فڕۆكەكەی داوەتە پاڵ چەكدارانی موقاوەمەی ئیسلامی و بانگەشەی ئەوەش دەكات كە "شەش ئەندامی تیمی فڕۆكەكە كوژراون".

فەرماندەیی ناوەندیی هێزەكانی ئەمریكا (سێنتكۆم)  دەڵێت "تیمەكانی ڕزگاركردن و گەڕان، لە شوێنی ڕووداوەكە لە ڕۆژئاوای عێراق، سەرقاڵی كارن". جەخت دەكاتەوە بەزوویی زانیاریی لەبارەی چارەنووسی تیمی فڕۆكەكە دەخاتەڕوو.