نێوەڕۆكی كۆبوونەوەیەكی ئۆجەلان و لیژنە پەڕلەمانییەكەی توركیا ئاشکراکرا

پەیام  

نێوەڕۆكی كۆبوونەوەیەكی ڕێبەری زیندانییكراوی پارتی كرێكارانی كوردستان (پەكەكە) و لیژنە پەڕلەمانییەكەی توركیا بڵاوكرایەوە.

پەڕلەمانی توركیا لە ماڵپەڕی خۆی، دەقی نووسراوی كۆبوونەوەی نێوان سێ پەڕلەمانتار لە كۆمسیۆنەكەی پەڕلەمان بۆ پرسی ئاشتی و عەبدوڵڵا ئۆجەلان ڕێبەری زیندانییكراوی پارتی كرێكارانی كوردستان (پەكەكە)ی بڵاو كردەوە.

كۆبوونەوەكە لە 24ی مانگی 11ی ساڵی 2025 لە دوورگەی ئیمرالی بەڕێوە چووە، لە بەشێكیدا ئۆجەلان ڕایگەیاندووە: كێشەی كورد چووەتە قۆناغێكی نوێ و پێویستە لە ڕێگەی سیاسییەوە چارەسەر بكرێت. ئۆجەلان وتوشیەتی: خەباتی چەكداری گەیشتووەتە كۆتایی و ئێستا كاتی ئەوەیە كورد و دەوڵەت لەسەر بنەمای 'كۆماری دیموكراتیك' و 'هاووڵاتیبوونی یەكسان' ڕێك بكەون.

بەپێی نێوەڕۆكی كۆبوونەوەكە كە لە 16 لاپەڕە پێكهاتووە، ئۆجەلان ستایشی ئازایەتیی سەرۆكی پارتی نەتەوەیی توركیا و سەرۆككۆماری توركیا دەكات بۆ ئەو هەڵوێستە مێژووییەی نواندوویانە و ڕایشیگەیاندووە: توركیا بەبێ كورد و كورد بەبێ توركیا ناتوانن لەم جوگرافیایەدا بە سەقامگیری بمێننەوە.

لەبارەی ڕۆژاوای كوردستان و باكووری سووریاشەوە لە كۆنووسەكاندا كە بەشێكی زۆری قسەكانی عەبدوڵڵا ئۆجەلان بۆ پرسی سووریا و هێزەكانی سووریای دیموكرات (هەسەدە) تەرخان كراوە. ئۆجەلان پێشنیاری كردووە مۆدێلی "دیموكراسیی خۆجێی لە باكووری سووریا جێبەجێ بكرێت و ئەو ناوچانە ببنە بەشێك لە دەوڵەتی سووریا، بەڵام بە شێوەیەكی دیموكراتیك".

ئۆجەلان ڕایگەیاندووە: "من دەتوانم لەگەڵ هەسەدە قسە بكەم بۆ ئەوەی هەنگاوی ئەرێنی بنێن، پێویستە ئەوان لەگەڵ توركیا و دەوڵەتی سووریا بگەنە ڕێك كەوتن". 

ئۆجەلان هۆشداری داوە بە هێزەكانی سووریای دیموكرات (هەسەدە) كە بۆ دروستكردنی دەوڵەت نەبێتە داردەستی ئیسڕائیل، یان هەر وڵاتێكی دیكە.