ئێران و ڕووسیا و چین مانۆڕێكی سەربازیی ئەنجامدەدەن و ترەمپ هۆشداریی دەدات

پەیام 

ئێران و ڕووسیا و چین ڕۆژی یەكشەممە مانۆڕێكی سەربازی لە گەرووی هورمز ئەنجام دەدەن، هاوكات دۆناڵد ترەمپ دەڵێت "هیوادارین ناچار نەبین هێزی سەربازی بەكاربهێنین و پێم باشە كێشەكان بە دیپلۆماسی چارەسەر بكرێن"

ماڵپەڕی "نوور نیوز"ی ئێرانی بڵاوی كردەوە، بڕیارە ڕۆژی یەكشەممەی داهاتوو مانۆڕێكی سەربازی هاوبەش لە نێوان ئێران، ڕووسیا و چین لە نزیك گەرووی هورمز بەڕێوە بچێت. ئەم مەشقە سەربازییە كە بە شێوەیەكی خولی و ساڵانە ئەنجام دەدرێت، هێزە دەریاییەكانی سوپا و سوپای پاسدارانی ئێران تێیدا بەشدار دەبن.
ماڵپەڕكە ئاماژەی بەوە كردووە، كە مانۆڕەكە بە ئامانجی بەرزكردنەوەی ئامادەیی سەربازی ئەنجام دەدرێت. هاوكات، محەمەد ئەكرەمی نیا، وتەبێژی سوپای ئێران هۆشداری دا كە هەر هێرشێكی ئەمریكا دەبێتە هۆی هەڵگیرسانی جەنگ لە تەواوی ناوچەكەدا.

لەلایەكی دیكەوە، دۆناڵد ترەمپ سەرۆكی ئەمریكا ئاشكرای كرد، كە لە ڕۆژانی ڕابردوودا لەگەڵ بەرپرسانی ئێران گفتوگۆی كردووە و داوای لێكردوون پەرەپێدانی چەكی ئەتۆمی و كوشتنی خۆپیشاندەران ڕابگرن. ترەمپ ئاماژەی بەوە كرد كە ئەمریكا كەشتیگەلێكی جەنگی زۆر گەورە و بەهێزی بەرەو ناوچەكە ڕەوانە كردووە، بەڵام جەختی كردەوە كە هیوادارە ناچار نەبن هێزی سەربازی بەكاربهێنن و پێی باشە كێشەكان بە دیپلۆماسی چارەسەر بكرێن. 

ئەم پێشهاتانە لە كاتێكدایە كە واشنتۆن هێشتا بژاردەی سەربازی و دیپلۆماسی وەك دوو ڕێگەی هاوتەریب بەرامبەر تاران بە كراوەیی دەهێڵێتەوە.