مالیكی مه‌رجی كشانه‌وه‌ی دیاریكرد

سەرۆکی هاوپەیمانیی دەوڵەتی یاسا بە یەک مەرج ئامادەیی بۆ کشانەوە لە کاندیدبوون بۆ پۆستی سەرۆکوەزیران نیشان دا و ڕایشیگەیاند: دەمانەوێت ئەمریکا تێبگەیەنین کە ئێمە دژی کەس نین.

لە گفتگۆیەکی تەلەفزیۆنییدا، نوری مالیکی سەرۆکی هاوپەیمانیی دەوڵەتی یاسا و سەرۆکی حزبی دەعوە ڕایگەیاند: وەک هاووڵاتیەکی عێراقی لەلایەن چوارچێوەی هەماهەنگییەوە کاندید کراوم ناکرێت لەسەر داوای دەوڵەتێکی بیانی بکشێمەوە، تەنیا کاتێک ئامادەم بکشێمەوە کە زۆرینەی چوارچێوەی هەماهەنگی ئەو داوایە بکەن.

سەبارەت بەو نووسراوەی تڕەمپ لەبارەیەوە بڵاوی کردەوە، مالیکی دەڵێت: سەرۆکی ئەمریکا لەلایەن سێ وڵات و لایەنی نێوخۆییەوە لە دژی ویلایەتی سێیەمی ئەو بە هەڵە تێگەیەنراوە، پێم وایە ئەو تویتەیشی بەناوی ترەمپەوە کراوە لە نێوخۆی عێراق نووسراوە نەک ترەمپ خۆی، بەڵام لەوە دڵنیا نیم.

هاوکات کاندیدەکەی چوارچێوەی هەماهەنگی ڕەتی کردەوە کاندیدبوونی ببێتە هۆی سزای ئابووری بەسەر عێراقدا و بە پڕوپاگەندەی زانی بۆ ناچارکردنی بە پاشەکشە.

لەبارەی دۆخی سووریای نوێشەوە، مالیکی ئامادەیی عێراقی بۆ هاوکاریی ئەحمەد شەرع، سەرۆکی نوێی ئەو وڵاتە دەربڕی و ڕایگەیاند: ئەگەر شەرع دیمەشق لە تیرۆر پاک ڕابگرێت و تیرۆریستان بەرەو بەغدا ڕەوانە نەکات، ئەوا لە داهاتوودا پەیوەندییەکی پتەو لە نێوانیاندا دەبێت.