عێراق پێشنیازێکی بۆ ئاساییکردنەوەی پەیوەندییەکانی تاران و ریاز خستە ڕوو

پەیام

بەغدا پێشنیازێکی ئاراستەی ئێران و سعوودیە کردووە بۆ پێکهێنانی ئەنجوومەنێکی هەماهەنگیی ئەمنیی هاوبەش، بە مەبەستی چارەسەرکردنی قەیرانی سیاسی نێوان هەردوو وڵات. 

قاسم ئەعرەجی، ڕاوێژکاری ئاسایشی نەتەوەیی سەرۆکوەزیرانی عێراق، لە لێدوانێکدا بۆ کەناڵی هەواڵیی "عێراقییە" ئاشکرای کرد کە ئامانجی سەرەکیی ئەم دەستپێشخەرییە کەمکردنەوەی ئەو بۆشاییە سیاسییەیە کە ناوبراو بە "قەیرانی متمانە" لەنێوان ڕیاز و تاران وەسفی کردووە. تاوەکوو ئێستا هیچ وردەکارییەکی زیاتر لەبارەی ناوەڕۆکی پێشنیازەکە نەخراوەتەڕوو، هاوکات دەسەڵاتدارانی سعوودیە و ئێران هیچ لێدوان و کاردانەوەیەکی خێرایان سەبارەت بەم هەنگاوە نەبووە. 

ئەم هەوڵەی بەغدا لە کاتێکدایە کە ناوچەکە بە تەنگەژەیەکی سیاسی و ئەمنی و ئابووری توندا تێدەپەڕێت و چەندین جار لە ئێران و عێراقەوە هێرشی درۆنی کراوەتە سەر ژێرخانی وزەی سعودییە و ئەو وڵاتەش ناڕەزایەتی و کاردانەوەی توندی نواندووە. 

لە ٢٧ی تەممووزی ڕابردوودا، وەزارەتی بەرگریی سعوودیە ڕایگەیاند چەند فڕۆکەیەکی بێفڕۆکەوانیان تێکشکاندووە کە لە خاکی عێراقەوە هەڵفڕیبوون و هەوڵی بەئامانجگرتنی دامەزراوە نەوتییەکانیان لە ناوچەی ڕۆژهەڵات و ڕیاز دابوو. هاوکات کۆتایی مانگی ڕابردووش سعودییە بە هاوکاری ئەمریکا هێرشی کردە سەر بنکە و بارەگای گرووپە چەکدارە عێراقییەکان.