ترەمپ: چاودێریی پرسی سەرۆكوەزیرانی عێراق دەكەین و بژاردەمان بۆى هەیە

پەیام   

دۆنالد ترەمپ سەرۆكی ئەمریكا لەبارەی پرسی كاندیدی پۆستی سەرۆكوەزیرانی عێراقەوە بێ ئەوەی ڕاستەوخۆ كاندیدی دیارییكراوی شیعەكان ڕەت بكاتەوە، ڕایگەیاند: بزانین چی دەبێت، ئێمە خۆیشمان هەندێك بژاردەمان لەو بارەوە هەیە.

لە كۆنگرەیەكی ڕۆژنامەوانییدا لە كۆشكی سپی و لە وەڵامی پرسیارێكدا لەبارەی نووری مالیكی كاندیدی هێزەكانی چوارچێوەی هەماهەنگی شیعەكان بۆ پۆستی سەرۆكوەزیرانی عێراق، ترەمپ ڕایگەیاند: ئێمە چاودێریی پرسی سەرۆكوەزیرانی عێراق دەكەین، خۆیشمان هەندێك بیرۆكەمان لەوبارەوە هەیە!

هەر لەو بارەوە و لە وەڵامی پرسیاری ئایا ئێوە ڤیتۆتان لەسەر بوونی مالیكی بە سەرۆكوەزیرانی عێراق هەیە؟ سەرۆكی ئەمریكا بێ ئەوەی وەڵامێكی ڕاستەوخۆ بە بەڵێ، یان نەخێر بداتەوە، وتیشی: بزانین لە كۆتاییدا چی دەبێت، دەمانەوێت بگەین بە ڕێككەوتنێك، لە كۆتاییشدا هەمووان پێویستیان بە ئەمریكایە، هەمووان پێویستیان بە ئێمەیە.

دوایین هەڵوێستی ئەمریكا لەبارەی پرسی سەرۆكوەزیرانی عێراق دوای ئەوە دێت كە پێشتر و دوابەدوای كاندیدكردنی نووری مالیكی، دۆناڵد ترەمپ لە ڕێگەی تۆڕە كۆمەڵایەتییەكانەوە ڕایگەیاند: ئەگەر مالیكی هەڵبژێردرێتەوە چیدی ئەمریكا هاوكاریی عێراق ناكات، چونكە دوایین خولی سەرۆكایەتی مالیكی لە حكومەت عێراقی بەرەو هەژاری و بێسەروبەری تەواو برد.