ڕاوێژكاری كۆشكی سپی: چه‌كی ئه‌تۆمی بۆ تاران قبوڵ ناكه‌ین

په‌یام

ڕاوێژکارێکی کۆشکی سپی ڕایگەیاند واشنتن سەرجەم بژاردەکان، بە سەربازیشەوە، بەرانبەر ئێران بە کراوەیی دەهێڵێتەوە و ڕێگە نادات تاران ببێتە خاوەنی چەکی ئەتۆمی، هاوکات وا ده‌كات فشارە ئابوورییەکانی سەر ئەو وڵاتە ڕوو لە زیادبوون بن. 

ستیڤن میڵەر، ڕاوێژکاری کۆشکی سپی لە لێدوانێکدا بۆ تۆڕی "فۆکس نیوز" جەختی کردەوە ویلایەتە یەکگرتووەکانی ئەمریکا لە مامەڵەکردن لەگەڵ دۆسیەی ئێراندا سەرجەم ئەگەرەکانی لەسەر مێز هێشتووەتەوە. ئاماژەی بەوەش کرد کە سەرۆک ترەمپ بە شێوەیەکی کاریگەر بەشدارە لە داڕشتنی نەخشەی ئەو دانوستانانەی کە لەگەڵ تاراندا لە ئارادان. 

میڵەر ئاشکرای کرد کە واشنتن هەرچەندە هەوڵ بۆ بەدیهێنانی ئاشتی و سەقامگیری دەدات، بەڵام بە هیچ شێوەیەک قبووڵی ناکات ئێران ببێتە خاوەنی چەکی ئەتۆمی. ناوبراو هۆشداریشی دا کە بژاردەی سەربازی هێشتا لە ئارادایە، کە ئەوەش لەوانەیە هێرشی توند بگرێتەوە و ببێتە هۆی پەکخستنی ژێرخانی وزەی ئێران بۆ ماوەی چەندین ساڵ. 

سەبارەت بە دۆخی ناوخۆیی و ئابووری ئەو وڵاتەش، ڕاوێژکارەکەی کۆشکی سپی ئاماژەی پێ کرد کە گەمارۆی دەریایی و سنووردارکردنی جووڵەی وزە، فشارێکی بێوێنەی خستووەتە سەر ئابووری ئێران و کاریگەرییەکان بە ڕوونی دەردەکەون.