تڕەمپ: بیرم لە درێژکردنەوەى ئاگربەست نەکردوەتەوە

پەیام
دۆناڵد ترەمپ، سەرۆکی ئەمریکا ڕەخنەی توند لە هاوپەیمانیی ناتۆ دەگرێت و وێڕای جەختکردنەوە لە ڕێگرییەکانی بەردەم ئێران بۆ بەدەستهێنانی چەکی ئەتۆمی، ئاماژە بە ئەگەرەکانی ڕێککەوتن و گۆڕانکاریی گەورە لە ناوچەکەدا دەکات. 
دۆناڵد ترەمپ، سەرۆکی ویلایەتە یەکگرتووەکانی ئەمریکا لە لێدوانێکی نوێدا هێرشی کردە سەر هاوپەیمانیی ناتۆ و ڕایگەیاند، ئەم هاوپەیمـانییە لە ڕابردوودا لەگەڵیاندا نەبووە و لە داهاتووشدا نابێت. هاوکات پەیامێکی ئاراستەی پاپای ڤاتیکان کرد و جەختی لەوە کردەوە کە خاوەندارێتیی ئێران بۆ بۆمبی ئەتۆمی بە هیچ شێوەیەک قبووڵکراو نییە. 
سەبارەت بە پەیوەندییەکان لەگەڵ تاران، ترەمپ لە چاوپێکەوتنێکدا لەگەڵ کەناڵی (ABC) ئاماژەی پێ کرد کە گەیشتن بە ڕێککەوتن باشترین بژاردەیە، چونکە دەرفەت بە ئێران دەدات جارێکی دیکە وڵاتەکەی بونیاد بنێتەوە. ناوبراو باسی لەوەش کرد کە ئێستا سیستەمێکی جیاواز لە ئێراندا هەیە و توانیویانە توندڕەوەکان لە گۆڕەپانەکە دوور بخەنەوە. 
لە لایەکی دیکەوە، سەرۆکی ئەمریکا ڕەتیکردەوە بیر لە درێژکردنەوەی ئاگربەست بکاتەوە و وتی: "پێناچێت پێویست بەوە بکات، لە دوو ڕۆژی داهاتوودا گۆڕانکاریی سـەرسوڕهێنەر دەبینن. " ترەمپ لە کۆتایی لێـدوانەکانیدا ستایشی ڕۆڵی خۆی کرد و ڕایـگەیاند ئەگەر ئەو سەرۆکی ئـەمریکا نەبوایە، ئێستا جیهان پارچەپارچە ببوو.