سێشەممە گەڕی دووەمی دانوستانەكانی ئەمریكا و ئێران لە سویسرا بەڕێوەدەچێت

پەیام   

ڕۆژی سێشەممە گەڕی دووەمی دانوستانەكانی ئەمریكا و ئێران بە نێوەندگیری عومان و لە پایتەختی سویسرا دەستپێدەكات.

ئاژانسی ڕۆیتەرز بڵاویكردەوە، ڕۆژی سێشەممەی داهاتوو، شاری ژنێڤی پایتەختی سویسرا میوانداری گەڕی دووەمی دانوستانە ناڕاستەوخۆكانی نێوان شاندی ویلایەتە یەكگرتووەكانی ئەمریكا و كۆماری ئیسلامی ئێران دەكات.

سەرچاوەیەك بە ئاژانسەكەی ڕاگەیاندووە: شاندەكەی ئەمریكا هەریەك لە نێردراوان "ستیڤ ویتكۆف" و "جارید كوشنەر" لەخۆ دەگرێت و بەیانی ڕۆژی سێشەممە لەگەڵ بەرپرسانی ئێران كۆدەبنەوە، نوێنەرانی سەڵتەنەتی عومان بۆ ئاسانكاری پەیوەندییەكان و نێوەندگیریكردن لە نێوان هەردوولادا ئامادە دەبن.

لە لایەكی دیكەوە، پێگەی "ئاكسیۆس"ی ئەمریكی ئاشكرای كردووە "واشنتن لە ڕێگەی عومانەوە چەند پەیامێكی سەبارەت بە دانوستانە ئەتۆمییەكان بۆ ئێران ناردووە.

 بەپێی زانیارییەكانی ئاكسیۆس "ستێڤ ویتكۆف لەم هەفتەیەدا پەیوەندییەكی تەلەفۆنی لەگەڵ وەزیری دەرەوەی عومان ئەنجام داوە و ناوەڕۆكی پەیامەكانی پێ ڕاگەیاندووە".

وەزیری دەرەوەی عومان بە پشتبەستن بەو پەیوەندییە، بەڵگەنامەیەكی ئامادە كردووە و لە كاتی سەردانی عەلی لاریجانی، سكرتێری ئەنجومەنی باڵای ئاسایشی نیشتمانی ئێرانی بۆ مەسقەت ڕادەستی ناوبراوی كردووە. لاریجانی-یش پشتڕاستی كردەوە كە ئەو بەڵگەنامەیەی وەرگرتووە.