پێش 4 هەفتە
218 جار خوێنراوەتەوە
ترەمپ: ئێران ڕازی بێت بە ڕێككەوتن، هیچ هێرشێك ئەنجامنادەین
پەیام
سەرۆكی ئەمریكا بۆ یەكەمینجار باس لە گۆڕینی ڕژێمی ئێران دەكات و لە هەمانكاتدا خواستیشی بۆ ڕێككەوتن دووپات كردەوە و وتى، "ئەگەر ئێران ڕازی بێت بە ڕێككەوتن، هیچ هێرشێك ئەنجامنادەین".
لە وتارێكدا لە بنكەیەكی سەربازی لە ویلایەتی كارۆلینای باكووری وڵاتەكەی، دۆناڵد ترەمپ سەرۆكی ئەمریكا ڕایگەیاند: گۆڕینی ڕژێم لە ئێران ڕەنگە باشترین شت بێت كە ڕوو بدات. لە هەمانكاتدا دووپاتی كردەوە "ئەگەر تاران ڕازی بێت بە واژووكردنی ڕێككەوتنێكی دروست، هیچ هێرشێكی سەربازیی ئەنجام نادەین.
ترەمپ ئاماژەی بەوەش كرد "شێوازی مامەڵەی ئێران لە دانوستانە ئەتۆمییەكاندا "سەختە" و پێویستە تاران بترسێنرێت بۆ ئەوەی كێشەكان بە ئاشتییانە چارەسەر بكرێن".
سەرۆكی ئەمریكا ڕەخنەی توندی لە مێژووی 47 ساڵەی دانوستانەكانی تاران گرت و وتی: تەنیا كات كوشتن بووە و بووەتە هۆی لەدەستدانی ژیانی زۆر.
ئەمە یەكەمجارە سەرۆكی ئەمریكا بە ئاشكرا باس لە گۆڕینی دەسەڵات لە ئێران بكات، لە كاتێكدا پێشتر جەختی لە ستراتیژی "ئاشتی لە ڕێگەی هێزەوە" دەكردەوە.
هاوكات لەگەڵ ئەوە، سەرۆكی ئەمریكا ڕایشیگەیاند: كەشتی فڕۆكەهەڵگری جێڕاڵد فۆرد كە گەورەترینە لەسەر ئاستی جیهان بەمنزیكانە بەرەو ڕۆژهەڵاتی ناوەڕاست بەڕێ دەكەوێت، چونكە ئەگەر نەگەینە ڕێككەوتن پێویستییمان پێی دەبێت. وتیشی: شكستی دانوستانەكان دەبێتە ڕۆژێكی خراپ بۆ ئێران.
لە تۆڕە کۆمەڵایەتیەکان شەیری بکە