دژی یاسای قەدەغەكردنی باڵاپۆشی لە نەمسا خۆپیشاندان ئەنجامدرا

پەیام 

دژی یاسای قەدەغەكردنی باڵاپۆشی بۆ كچانی خوار 14 ساڵ لە پایتەختی نەمسا خۆپیشاندان بەڕێوەچوو.

بۆ دەربڕینی ناڕەزایەتی بەرانبەر بڕیاری پەرلەمانی نەمسا بۆ قەدەغەكردنی باڵاپۆشی لە قوتابخانەكان بۆ كچانی تەمەن خوار 14 ساڵ، خۆپیشاندانی سەدان كەسی چالاكانی مافی مرۆڤ و ڕێكخراوەكانی كۆمەڵگەی مەدەنی لە شاری ڤییەنای پایتەختی نەمسا بەڕێوەچوو.

خۆپیشاندەران دروشمی دژ بە سنوورداركردنی ئازادییە ئایینییەكانیان بەرزكردەوە و داوای هەڵوەشاندنەوەی یاساكە و پێداچوونەوە بە سیاسەتەكانی فرەكەلتوورییان كرد.

چالاكانی مافی مرۆڤ و ڕێكخراوەكانی كۆمەڵگەی مەدەنی، لەگەڵ دەستەی یەكسانیی نەمسا، بە ئاشكرا دژایەتی خۆیان بۆ یاساكە ڕاگەیاند و ئاماژەیان بەوە كرد "ئەم یاسایە تەنیا پێكهاتەیەكی دیارییكراو دەكاتە ئامانج و دەبێتە هۆی زیاتربوونی هەستی پەراوێزخستن لای كەمینە موسڵمانەكان و ڕێگری لە پرۆسەی خوێندنیان دەكات".

بەپێی ئەم یاسا نوێیە، هەر كەسێك سەرپێچی بكات بە بڕی تا 800 یۆرۆ سزا دەدرێت، لە حاڵەتی دووبارەبوونەوەی سەرپێچییەكەشدا ئەگەری زیندانییكردن هەیە. لە ئێستایشدا نەمسا قۆناغی هۆشیاركردنەوەی بۆ جێبەجێكردنی یاساكە دەست پێ كردووە، بەڵام بەپێی قسەی یاساناسان دەكرێت لەبەردەم دادگای دەستوورییدا تانە لەم یاسایە بدرێت.