كۆمەڵی ئیسلامیی بەنگلادیش: گومان و پرسیارى جدیمان لەسەر ئەنجامی هەڵبژاردنەكان هەیە

پەیام   

كۆمەڵی ئیسلامیی بەنگلادیش كە گەورەترین پارتی ئیسلامی ئەو وڵاتەیە، گومانی خۆی لە ئەنجام و پاكێتی ئەو هەڵبژاردنە دەربڕی كە دوێنێ بەڕێوەچو‌و و پلەی دو‌وەمی تێدا بەدەستهێنا.

ئەمڕۆ هەینی، شەفیقولڕەحمان ڕێبەری كۆمەڵی ئیسلامی، دانی بە شكستی پارتەكەیدا نا و بەڵێنی "سیاسەتێكی ئەرێنی" دا، پارتەكە لە بەیاننامەیەكی نوێدا هەڵوێستێكی دیكەی بڵاو كردەوە و ڕایگەیاند: گومان و پرسیاری جددییمان لەسەر پاكوبێگەردی ئەنجامەكان هەیە.

كۆمەڵی ئیسلامی بەنگلادیش ئاماژەی بەوە كردو‌وە كە لە پڕۆسەی ڕاگەیاندنی ئەنجامەكان ڕازی نین و دەڵێت: دژایەتی و دەستكاریی دو‌وبارە لە ڕاگەیاندنی ئەنجامە بەراییەكاندا دەبینرێت، ئەمەش گومان دەخاتە سەر دروستیی هەمو‌و پڕۆسەكە.

بەپێی میدیا ناوخۆییەكانی بەنگلادیش، پارتی نیشتمانیی بەنگلادیش بە سەرۆكایەتی تارق ڕەحمان، سەركەوتنێكی گەورەی بەدەست هێناوە و 212 كورسی لە كۆی 300 كورسی پەرلەمانی مسۆگەر كردو‌وە، لەكاتێكدا كۆمەڵی ئیسلامی پلەی دو‌وەمی گرتو‌وە و 74 كورسی بەدەست هێناوە، هەروەها  پارتی نیشتمانیی هاو‌وڵاتی  كە لەلایەن گەنجانی بزو‌وتنەوەی خوێندكارانەوە دامەزراوە، پلەی سێیەمی گرتو‌وە.

ئەم هەڵبژاردنە یەكەمین پڕۆسەی دەنگدانە لە دوای ڕاپەڕینەكەی ساڵی 2024 كە بو‌وە هۆی ڕو‌وخانی حكومەتەكەی شێخە حەسینە.