پێش 4 هەفتە
578 جار خوێنراوەتەوە
پەرلەمانتارێکى عێراق داواى بەخشینى نیوەى مووچەکانیان بە خەزێنەی دەوڵەت دەکات
پەیام
ئەندامێكی ئەنجوومەنی نوێنەرانی عێراق داوا دەكات بە مەبەستی ڕووبەڕووبوونەوەی قەیرانی دارایی پەڕلەمانتاران و وەزیران و خاوەن پۆستە تایبەتەكان نیوەی مووچەی مانگانەیان بە خەزێنەی دەوڵەت ببەخشن.
كەریم علێوی مەحمەداوی ئەندامی ئەنجومەنی نوێنەرانی عێراق دەسپێشخەرییەكی نیشتمانیی بەپەلەی ڕاگەیاندووە و تێیدا داوای لە ئەندامانی ئەنجومەنی نوێنەران، وەزیرەكان و سەرجەم خاوەن پلە تایبەتەكان كردووە نیوە، یان زیاتری مووچەی مانگانەیان بە خەزێنەی دەوڵەت ببەخشن.
لە ڕاگەیەنراوێكی نووسینگەی علێویدا لەوبارەوە، هاتووە "پێویستە ئەم ڕێكارە بۆ ماوەیەك بەردەوام بێت و شەش مانگ بۆ ساڵێكی تەواو بخایەنێت، یان تاوەكو تێپەڕاندنی قەیرانی ئابووریی ئێستا بەردەوام بێت".
ڕایشیگەیاند: ئامانج لەم هەنگاوە دۆزینەوەی سەرچاوەیەكی دارایی نوێیە بۆ دەوڵەت، بەشدارییەكی كاراشە لە كەمكردنەوەی باج و ڕەسمی گومرگی كە بوونەتە بارگرانی لەسەر شانی هاووڵاتیان.
بەپێی نوێترین ئامار خەرجیی ساڵانەی پلە تایبەتەكانی عێراق كە زیاتر لە شەش هەزار كەسن 420 ملیار دینار تێدەپەڕێنێت و چەندین جار داوای پێداچوونەوە و كەمكردنەوەی كراوە.
لە تۆڕە کۆمەڵایەتیەکان شەیری بکە