ئاسایش: هۆكاری سوتانی ئۆتۆمبێله‌كه‌ له‌ نزیك بازگه‌ی كه‌ڵه‌وانان ته‌نها ڕووداوی هاتووچۆ بووه‌

په‌یام

ئۆتۆمبێلێک لە نزیک بازگەی کەڵەوانان لە سنووری پارێزگای سلێمانی سووتا کە دوو سەرنشینی تێدابوو، ئەندامی حیزبێکی ڕۆژهەڵاتی کوردستان بوون، ئاسایش دەڵێت ڕووداوی هاتوچۆ بووە.

لە ڕووداوێکی تەمومژاویدا لەسەر ڕێگەی سەرەکیی دووکان - سلێمانی و لە نزیک بازگەی کەڵەوانان، ئۆتۆمبێلێکی جۆری لاندکرۆزەری گولـلەنەبڕ گڕی گرت و بەهۆیەوە پێشمەرگەیەکی کۆمەڵەی شۆڕشگێڕی زەحمەتکێشانی کوردستانی ئێران گیانی لەدەستدا و یەکێکی دیکەش بریندار بوو.

وتەبێژی دەزگای ئاسایشی هەرێم لە ڕوونکردنەوەیەکدا ڕایگەیاند، ڕووداوەکە تەنها ڕووداوێکی هاتوچۆ بووە و ئۆتۆمبێلەکە بەهۆی وەرگەڕانەوە گڕی گرتووە، ئاسایش جەختی کردەوە کە ئەو دەنگۆیانەی باس لە بۆردوومانی درۆن دەکەن دوورن لە ڕاستییەوە.

لە بەرانبەردا، ئیدریس کۆماس، بەرپرسی ڕاگەیاندنی کۆمەڵە، ڕووداوەکەی بە گوماناوی ناوبرد و ئاشکرای کرد کە ئۆتۆمبێلەکە هی عومەر ئیلخانیزادە بووە، بەڵام ناوبراو خۆی لەنێویدا نەبووە، سەرنشینەکان لە سلێمانییەوە بەرەو ناوچەی سوورداش گەڕاونەتەوە.

بەگوێرەی زانیارییەکان، ئەو دوو پێشمەرگەیەی لەناو ئۆتۆمبێلەکەدا بوون بریتین لە هێرش ڕەنجبەر خەڵکی ناوچەی لەیلاخی سنە کە گیانی لەدەستداوە، هەروەها ئارام بەهرامی خەڵکی سەقز بریندار بووە.

لە ئێستادا هێزە ئەمنییەکانی سلێمانی و دەزگای ئەمنییەتی کۆمەڵە خەریکی لێکۆڵینەوەی وردن لە ڕووداوەکە و بڕیارە ئەنجامەکان بۆ ڕای گشتی ئاشکرا بکرێن.