تۆم باراك: واشنتۆن عێراقێكی دەوێت لەگەڵ دیدگای ترەمپ هاوتەریب بێت

پەیام

نێردەی ئەمریكا دەڵێت، واشنتۆن عێراقێكی دەوێت كە هاوتەریب بێت لەگەڵ دیدگای دۆناڵد ترەمپ بۆ ناوچەكە.

تۆم باراك، باڵیۆزی ئەمریكا لە توركیا و نێردەی ئەمریكا بۆ سو‌وریا، كە ئێستا دۆسیەی ‏عێراقیشی كەوتو‌وەتە دەست، ئەمڕۆ لە نو‌وسینێكدا لە تۆڕی ئێكس، كۆبو‌ونەوەكەی ‏دوێنێی لەگەڵ محەمەد شیاع سو‌ودانی، سەرۆكوەزیرانی عێراق، بە "بەرهەمدار" ناو برد و ڕایگەیاند: "بو‌ونی سەركردایەتییەكی كاریگەر" كە لە ئاست سیاسەت و ‏پێشخستنی سەقامگیریی عێراقدا بێت، بە "كلیلی ئامانجە هاوبەشەكان"ـی ئەمریكا و ‏عێراقە.

نوێنەرەكەی ئەمریكا نووسیویەتی:"عێراقێكی خاوەن سەروەری و سەقامگیر و گەشەسەندو‌ومان دەوێت، كە هاوتەریب بێت ‏لەگەڵ دیدگا و پلانەكانی سەرۆكی ئەمریكا بۆ گەیشتن بە ئاشتی و خۆشگوزەرانی لە ‏ناوچەكەدا.

كۆبو‌ونەوەكەی باراك و سو‌ودانی، دوێنێ لە بەغداد بەڕێوە چو‌و، ‏نو‌وسینگەی ڕاگەیاندنی سەرۆكوەزیرانی عێراق دەربارەی ناوەرۆكی كۆبو‌ونەوەكە ڕایگەیاند ‏‏"بیروڕا ئاڵوگۆڕ كرا سەبارەت بە ڕێگریكردن لە پەرەسەندنی گرژییەكان لە ناوچەكەدا و ‏گرنگیی پەنابردنە بەر گفتوگۆ و ڕێكارە دیپلۆماسییەكان بۆ چارەسەركردنی ‏ناكۆكییەكان".‏

ئەمە لەكاتێكدایە دوایین زانیارییەكان جەخت لەوە دەكەنەوە كە ئەمریكا لەسەر ڤیتۆكەی دژی نو‌وری ‏مالیكی سو‌ورە و داوای كاندیدێكی نوێ لە هێزە شیعەكان دەكات. هەروەها چاوەڕوان دەكرێت لە چەند ڕۆژی داهاتو‌ودا لایەنە ‏شیعەكان پرسی كاندیدی سەرۆكوەزیرانی عێراق یەكلا بكەنەوە.