2 کاتژمێر پێش ئێستا
114 جار خوێنراوەتەوە
قۆناغی یاسادانان بۆ پرۆسەی ئاشتی لە پەرلەمانی توركیا دەستپێدەكات
پەیام
دوای مانگی ڕەمەزان قۆناغی یاسادانان بۆ پڕۆسەی ئاشتی لە پەڕلەمانی توركیا دەخرێتە بەرنامەی كارەوە و ڕاپۆرتی كۆمسیۆنە تایبەتمەندەكە تاوتوێ دەكرێت.
نوعمان كورتوڵموش سەرۆكی پەرلەمانی توركیا لە كۆبوونەوەیەكی لەگەڵ نوێنەرانی میدیاكان و سەرنووسەری ئاژانسەكانی هەواڵ ڕایگەیاند: لەو باوەڕەدام دوای قۆناغی ڕاگەیاندنی ڕاپۆرتی كۆمیسیۆنی هاوپشتی نەتەوەیی، برایەتی و دیموكراسی كە مەبەستی ئەو لیژنەیەیە بۆ پرۆسەی ئاشتی لە پەرلەمانی توركیا پێكهێنراوە، پێویستە قۆناغی یاسادانان بخرێتە بەرنامەی كارەوە.
لەبارەی ڕاپۆرتی كۆمیسیۆنە تایبەتەكەی پڕۆسەی ئاشتییەوە، كورتوڵموش وتی: پێویستە دوای ڕەمەزان قۆناغی یاسادانان بخرێتە بەرنامەی كارەوە.
سەرۆكی پەڕلەمانی توركیا ئاماژەی بەوەش كرد "چرایەكی ڕووناكی ژیانمان بۆ توركیا داگیرساند، بەڵام ئەمە بەو مانایە نییە كە هەموو شتێك تەواو بووە، بەڵكوو پێویستی بە كاری چڕ هەیە".
لەبارەی گۆڕینی دەستوریشەوە ئەو وتی: یەكێك لەو بنەمایانەی ڕێككەوتنى لەسەری كراوە ئەوەیە دەستووری كودەتای 12ی ئەیلوول ناتەواوە، هیوادارم لەم بارەشەوە كۆدەنگییەك دروست بێت.
هاوكات لە وەڵامی ڕۆژنامەنووسانیشدا، كورتوڵموش هەموو دەنگۆیەك سەبارەت بە ئەنجامدانی "چاكسازی دەستووریی نهێنی" ڕەت كردەوە و بە ناپراكتیكی وەسف كرد.
لە تۆڕە کۆمەڵایەتیەکان شەیری بکە