داعش هەڕەشە لە حكومەتی سووریا دەكات و شەرع بە بووكەڵە ناو دەبات

پەیام

داعش لە پەیامێكی دەنگیدا هەڕەشەی توند لە حكومەتی نوێی سووریا دەكات و بە حكومەتێكی "عەلمانی و هەڵگەڕاوە لە ئایین" وەسفی دەكات، هاوكات ڕایدەگەیەنێت كە سووریا تەنیا لە دەستی ئێرانەوە كەوتووەتە ژێر هەژموونی ئەمریكا و توركیاوە.

لە ڕێگەی پلاتفۆرمەكانی سەر بەو گرووپەوە، تۆمارێكی دەنگیی ئەبو حوزەیفە ئەنساری، وتەبێژی ڕێكخراوی داعش بڵاوكرایەوە،كە تێیدا دەڵێت: حكومەتی ئێستای سووریا "حكومەتێكی عەلمانییە و لە ئایین هەڵگەڕاوەتەوە، بۆیە پێویستە شەڕی لەگەڵدا بكرێت بۆ ئەوەی خاكی شام لە دەستیان ڕزگار بكرێت".

 هەروەها وتەبێژەكەی داعش هەڕەشە لە سەرۆكی حكومەتی گواستنەوە دەكات و دەڵێت: "كۆتایی ئەحمەد شەرع هیچ جیاواز نابێت لە كۆتاییەكەی بەشار ئەسەد".

لە بەشێكی دیكەی قسەكانیدا، وتەبێژەكەی داعش هێرشێكی توند دەكاتە سەر جۆلانی و پێی وایە سیستەمەكەی ملكەچی هەژموونی ئەمریكایە و فریوی توركیا و ڕۆژئاوای خواردووە.

ئەنساری ئۆپەراسیۆنی (بەرپەرچدانەوەی دەستدرێژی) كە بووە هۆی ڕووخانی ڕژێمەكەی ئەسەد بە "شانۆگەرییەكی توركی بە دەرهێنانی ئەمریكی" ناوبردووە و ڕایگەیاندووە كە لەمەودوا ئەوان حوكمی سووریا دەكەن و جۆلانیش تەنها "بووكەڵەیەكی بێ ڕۆحە" و لەلایەن ئەوانەوە دەجوڵێنرێت.