بۆ مووچەی مانگی شوبات دارایی عێراق چاوەڕێی دارایی هەرێمە

پەیام

بەغداد هەموو ئامادەكارییەكانی ناردنی مووچەی هەرێمی تەواو كردووە و چاوەڕێی هەرێمە كە تا ئێستا 120 ملیار دینارەكەی داهاتی ناوخۆی ئامادە نەكردووە، مووچەخۆرانیش چاوەڕێن حكومەت، لە ناردنی ئەو پارەیە پەلە بكات.

ئێوارەی ڕۆژی دووشەممە وەزارەتی دارایی هەرێم لیستی مووچەی مانگی شوبات و تەرازووی پێداچوونەوەی مانگی كانوونی دووەمی ڕەوانەی بەغداد كرد، بەڵام دوای سێ ڕۆژ هێشتا ئەو 120 ملیارەی ئامادە نەكردووە كە پێویستە بۆ ناردنی مووچەی مووچەخۆرانی هەرێم لەلایەن بەغدادەوە ڕەوانە بكرێت.

بەپێی زانیارییەكانی پەیام دوای گەیشتنی لیستی مووچە بە بەغداد، لەئێستادا وردبینیكردن تیایدا كۆتایی هاتووە، هاوكات وەزارەتی نەوتی عێراق لە بەردەوامیی هەناردەكردنی نەوتی هەرێم بەپێی ئەو بڕەی لەسەری ڕێككەوتوون، وەزارەتی دارایی عێراقی ئاگادار كردووەتەوە.

بەمەش ئامادەكارییەكانی عێراق لەوبارەیەوە تەواو بوون و بەغداد چاوەڕێی هەرێمە بۆ ناردنی 120 ملیاری داهاتی ناوخۆ تاكو دەست بە تەمویلكردنی مووچەی مانگی شوبات بۆ هەرێم بكات.

هەرچەندە هاووڵاتیانی هەرێم لەئێستادا بە وردی چاودێریی هەنگاوەكانی ناردنی مووچە لە بەغدادەوە دەكەن تا بەشێك لە كێشە داراییەكان و سەختیی ژیانیان كەم بكاتەوە، بەڵام بەغداد بەپێی ڕێككەوتنەكەی ساڵی ڕابردوویان، بۆ ناردنی مووچە چاوەڕێی دارایی هەرێمە تا پشكی داهاتی ناوخۆی بۆ ڕەوانە بكات و لە هەرێمیش هەنگاوەكان بە شێوەیەكی سست و لەسەرخۆ بەڕێوە دەچن.

ئەمڕۆیش دارایی هەرێم 120 ملیارەكەی ڕەوانەی بەغداد نەكرد و پێدەچێت بگاتە ناوەڕاستی هەفتەی داهاتوو.