پێشنیازكراوه‌ بۆ ماوه‌ی ده‌ ڕۆژ هێرشه‌ سه‌ربازییه‌كانی سه‌ر ئێران ڕابگیردرێت

په‌یام
قەتەر و میسر و پاکستان و چەند وڵاتێکی ناوچەکە پێشنیازێکی نوێیان بۆ ئاگربەستێکی ۱۰ ڕۆژە ئاراستەی ئەمریکا و ئێرانیان کردووە، بەمەبەستی ڕاگرتنی ڕووبەڕووبوونەوە سەربازییەکان و ڕەخساندنی دەرفەتێک بۆ دانوستاندنی دیپلۆماسی. 
بەرپرسانی ئەمریکا ڕایانگەیاندووە کە ئیدارەی واشنتن تاوتوێی ئەم پێشنیازە دەکات و داوای لە ئیسرائیلیش کردووە لە هەر هەنگاوێک خۆبەدوور بگرێت کە ببێتە هۆی داخرانی دەرگا لەم هەوڵە دیپلۆماسییە. بەڵام هاوکات لەگەڵ ئەم هەوڵانەدا، سوپای ئەمریکا بەهۆی ئەگەری شکستھێنانی دانوستاندەکان، دەیان فڕۆکەی جەنگی و فڕۆکەی سووتەمەنیگەیاندنی ڕەوانەی ڕۆژهەڵاتی ناوەڕاست کردووە. لەلایەکی دیکەشەوە، سەرچاوە ئیسرائیلییەکان ئاماژەیان بەوە کردووە کە سوپای وڵاتەکەیان لە ئامادەباشیی بەرزدایە بۆ ڕووبەڕووبوونەوەی ھەر ئەگەرێکی فراوانبوونی شەڕەکە لە ناوچەکەدا. 
ئەم هەوڵە نێوەندگیرییانە لە کاتێکدان کە دە ڕۆژ بەسەر بۆردومانەکانی ئەمریکا بۆ سەر ئامانجەکان لە ئێران تێدەپەڕێت، کە تیایدا سێ سەربازی ئەمریکی لە ئوردن و عێراق کوژران. پێشتریش سەرۆکی ئەمریکا ڕایگەیاندبوو کە فەرمانی بە پێنتاگۆن کردووە تاوەکو بەتوندی وەڵامی ئێران بدەنەوە بەرانبەر کوژرانی هەر سەربازێکی ئەمریکی. ئەمەش بووەتە هۆی ئەوەی وڵاتانی نێوەندگیر هەوڵەکانیان بۆ ڕاگرتنی ئەم زنجیرە هێرشە ئاڵوگۆڕکراوانە چڕتر بکەنەوە. 
پێشنیازە نوێیەکە داوای ڕاگرتنی تەواوەتی کردەوە سەربازییەکان دەکات و مەرجی سەرەکیشی ئاساییکردنەوەی هاتوچۆی دەریاییە لە گەرووی هورمزدا؛ بە شێوەیەک کە کەشتیوانی لە ئاوە هەرێمییەکانی عومان لە هێرشەکانی ئێران بپارێزرێت و ڕێڕەوی باکووریش لە ئاوەکانی ئێران لە گەمارۆی دەریایی ئەمریکا ڕزگاری بێت، تاوەکو زەمینە بۆ ڕێککەوتنی دوولایەنە خۆش بێت.