ئەنجوومەنی كاتیی ڕێبەرایەتیی ئێران تاوتوێى هەڵبژاردنی ڕێبەری نوێ دەکات

پەیام 

بۆ تاوتوێكردنی هەڵبژاردنی ڕێبەری نوێ ئەنجومەنی كاتیی ڕێبەرایەتیی ئێران كۆبووەوە و وەڵامی دەستێوەردانەكانی تڕەمپیشیان دایەوە.

ئاژانسی هەواڵی ئێران بڵاوی كردەوە: "ئەنجومەنی كاتیی ڕێبەرایەتیی" بۆ تاوتوێكردنی چۆنیەتی ئەنجامدانی كۆبوونەوەی ئەنجومەنی شارەزایانی ڕێبەری، كە ئەركی دەستنیشانكردنی ڕێبەری باڵای نوێی وڵاتی لەسەر شانە، بە سەرۆكایەتی مەسعود پزیشكیان كۆبووەتەوە.

لە كۆبوونەوەكەدا، ئەنجومەنەكە وەڵامی لێدوانەكانی دۆناڵد تڕەمپ، سەرۆكی ئەمریكا سەبارەت بە هەڵبژاردنی سەركردەی داهاتوو دایەوە و بەرپرسانی تاران جەختیان كردەوە، كە قسەكانی تڕەمپ ئامانجە "قیناوییەكانی دوژمن" لەم جەنگەدا ئاشكرا دەكات و گەلی ئێران ڕێگە بە هیچ دەستێوەردانێك نادات، بەڵكو بە خۆڕاگریی خۆیان ئەمریكا و قەوارەی زایۆنی چۆك پێ دادەدەن.

هاوكات ئاژانسی تەسنیم ئاماژەی بەوە كردووە كە عەلی لاریجانی، ئەمینداری ئەنجومەنی ئاسایشی نەتەوەیی ڕاپۆرتێكی لەسەر دوایین گۆڕانكارییەكانی بەرەكانی جەنگ پێشكەش كردووە. حكومەتیش ڕاسپێردراوە پێداویستییە بنەڕەتییەكانی وەك دەرمان و كاڵا گرنگەكان بۆ هاووڵاتییان دابین بكات.

ئەنجوومەنی كاتیی سەركردایەتی لە مەسعوود پزیشكیان، غولام حسێن موحسینی ئاژەیی و عەلی ڕەزا ئەعرافی پێكدێت، بەڵام تا ئێستا هیچ كاتێكی دیاریكراویان بۆ كۆبوونەوەی ئەنجومەنی شارەزایان و ڕاگەیاندنی ڕێبەری نوێ دیارینەكردووە.