2 کاتژمێر پێش ئێستا
171 جار خوێنراوەتەوە
ئەمریكا: بەردەوام دەبین لە وێرانكردنی پاشماوەی هێزەكانی ئێران
پەیام
وەزیری جەنگی ئەمریكا، ڕایگەیاند واشنتۆن بێ هیچ بەزەییەك بەردەوام دەبێت لە وێرانكردنی پاشماوەی هێزەكانی ئێران و گومانیش لەسەر تەندروستیی ڕێبەری نوێی ئێران دروست دەكات.
پیت هێگسێت، وەزیری جەنگی ئەمریكا، لە كۆنگرەیەكی ڕۆژنامەوانیدا لە پێنتاگۆن ڕایگەیاند، هێزە ئاسمانییەكانی ئەمریكا و ئیسرائیل یەكگرتووییەكی "شكستنەخۆرانە"یان پێكهێناوە و سوپای ئێرانیان بەرەو نەمان بردووە.
هێگسێت ئاشكرای كرد كە ئەمڕۆ "بەرزترین قەبارەی هێرشە ئاسمانییەكانی ئەمریكا" لە ئاسمانی ئێران ئەنجام دەدرێت.
سەبارەت بە دۆخی ناوخۆیی تاران، وەزیری بەرگری ئەمریكا ئاماژەی بەوە كرد كە سەركردایەتی ئێران خۆیان حەشارداوە، گومانی خستە سەر بێدەنگیی موجتەبا خامنەیی و ڕایگەیاند كە ناوبراو "بریندارە"، هەر بۆیە تەنیا پەیامی نووسراو بڵاودەكاتەوە و هیچ دەنگ و ڕەنگێكی نییە.
لە ڕووی سەربازییەوە، هێگسێت وتی: "ئێران ئیتر نە هێزی ئاسمانی، نە بەرگریی ئاسمانی و نە هێزی دەریایی ماوە."
ئاماژەی بەوەش كرد كە توانای مووشەكیی ئێران 90% و توانای درۆنەكانیان 95% كەمی كردووە، داخستنی گەرووی هورمزیشی لەلایەن تارانەوە بە هەنگاوێكی "ناچاری" ناوبرد.
هاوكات ژەنەراڵ دان كین، سوپاسالاری ئەمریكا لە هەمان كۆنگرەدا ڕایگەیاند كە ئەمڕۆ پڕكارترین ڕۆژی وڵاتەكەیان بووە و وتی: زیاتر لە شەش هەزار ئامانجیان لە ئێران بە ئامانج گرتووە و جەختی لە بەردەوامی بەئامانجگرتنی كۆگانی چەك و تەقەمەنی و ڕووبەڕووبوونەوەی هێرشەكانی ئێران بۆسەر وڵاتانی دراوسێی كردەوە.
لە تۆڕە کۆمەڵایەتیەکان شەیری بکە