جەنگى سەر ئێران ماوەی مانەوەی خوێندكارانى هەرێمى تا 15ی نیسان درێژکردەوە

پەیام

بەهۆی دۆخی جەنگ و ناسەقامگیری ناوچەكە، ماوەی مانەوەی ئەو خوێندكارانەی هەرێم كە لە زانكۆكانی ئێران دەخوێنن، تاوەكو 15ی نیسانی 2026 درێژ كرایەوە.

وەزارەتی خوێندنی باڵا و توێژینەوەی زانستیی حكومەتی ماوەبەسەرچووی هەرێمی كوردستان بڕیارێكی نوێی لە بەرژەوەندی ئەو خوێندكارانە دەركرد كە لە زانكۆكانی كۆماری ئیسلامیی ئێران دەخوێنن. 

بەپێی بڕیارەكە د. ئارام محەمەد قادر، وەزیری خوێندنی باڵا، ماوەی مانەوەی ئەو خوێندكارانە كە لە ناو هەرێمی كوردستانن و بڕیار بوو لە 28ی ئادار كۆتایی بێت، بۆ 15ی نیسانی 2026 درێژ كردوەتەوە.

ئەم بڕیارە وەك هەنگاوێكی بەپەلە دێت بۆ پاراستنی گیانی قوتابیان و خوێندكارانی هەرێم لە توندبوونەوەی بارودۆخی جەنگ و ناسەقامگیریی ئەمنیی ناوچەكە. وەزارەت ئاماژەی بەوەشكردووە، كە ئەم ماوەیە وەك "مانەوەی یاسایی" بۆ خوێندكاران هەژمار دەكرێت و لە داهاتوودا لە كاتی یەكسانكردنی بڕوانامەكانیان، تووشی هیچ كێشەیەكی یاسایی و كارگێڕی نابنەوە.

وەزارەتی خوێندنی باڵا ڕایشیگەیاندووە، كە لە دوای بەرواری 15ی نیسان، جارێكی دیكە هەڵسەنگاندن بۆ بارودۆخی سیاسی و سەربازیی ناوچەكە دەكەنەوە، تاوەكو بڕیار و ڕێنمایی نوێ و گونجاو لە بەرژەوەندی خوێندكاران دەربكەن.