بەهۆی جەنگەوە زۆربەی چالاكییە نەوتییەكان لە عێراق ڕاگیراون

پەیام

وەزارەتی نەوتی عێراق ڕایگەیاند: زۆربەی چالاكی و پڕۆژە نەوتییەكان لە ئێستادا بەهۆی دەرەنجامەكانی جەنگەوە ڕاگیراون.

ئەمڕۆ هەینی، باسم محەمەد خزەیر، بریكاری وەزارەتی نەوتی عێراق بۆ كاروباری دەرهێنان، ڕایگەیاند: زۆربەی چالاكی و پڕۆژە نەوتییەكان لە ئێستادا بەهۆی بەردەوامی جەنگەوە ڕاگیراون، بەڵام گەڕانەوە بۆ ئاستی پێشووی بەرهەمهێنان لە كێڵگە نەوتییەكان كارێكی ئاسانە و لە ئەگەری كۆتاییهاتنی قەیرانەكەدا، تەنیا چەند ڕۆژێكی كەم دەخایەنێت.

ئەو بەرپرسەی وەزارەت ئاماژەی بەوە كرد، پڕۆژەكانی غاز بە تەواوی نەوەستاون، بەڵام بەردەوامبوونیان پەیوەستە بە وەستانی جەنگەوە.

جەختی لەوەشكردەوە، كارمەندە عێراقییەكان بەهۆی بوونی ئەزموونێكی زۆرەوە، بە شێوەیەكی كارا كێڵگە بەرهەمهێنەرەكان بەڕێوە دەبەن و لە دوورەوە لەگەڵ كۆمپانیا بیانییەكان هەماهەنگی دەكەن.

خزەیر ڕوونیشی كردەوە "گەورەترین ئاستەنگ لەبەردەم پڕۆژە ژێرخانییە وزەییەكانە، چونكە ئەو پڕۆژانە بە تەواوی پشت بە هاوردەكردنی كەرەستە و پاڵپشتی لۆجیستی دەبەستن".

هەروەها ئاماژەی بەوەشكرد، داخستنی گەرووی هورمز لەم بارودۆخەدا، بووەتە ئاڵنگارییەكی گەورە لەبەردەم بەردەوامی و جێبەجێكردنی پڕۆژە ستراتیژی و گرنگەكانی كەرتی وزە.