فایەق زێدان: هەنگاوەکانى گروپە چەكدارەكان عێراق ڕووبەڕووی سزای نێودەوڵەتی دەكاتەوە

پەیام

سەرۆكی ئەنجومەنی باڵای دادوەریی عێراق ڕایدەگەیەنێت: بڕیاری جەنگ تەنیا لە دەسەڵاتی دەوڵەتدایە، هەنگاوە تاكلایەنەكانی گروپە چەكدارەكانیش وڵات ڕووبەڕووی سزای نێودەوڵەتی دەكاتەوە.

لە نووسینێكیدا، فایەق زێدان، سەرۆكی ئەنجومەنی باڵای دادوەریی عێراق ڕایگەیاند: ڕاگەیاندنی باری جەنگ، یان دۆخی نائاسایی یەكێكە لە مەترسیدارترین بڕیارە سەروەرییەكان و بەپێی دەستوور تەنیا لە دەسەڵاتی دەوڵەتدایە. 

ئاماژەی بەوەش كرد "بە پێی دەستوور ئەم بڕیارە پێویستی بە داواكارییەكی هاوبەشی سەرۆككۆمار و سەرۆك وەزیران هەیە و دەبێت دوو لەسەر سێی ئەندامانی پەرلەمانیش ڕەزامەندی لەسەر بدەن".

زێدان هۆشداری تووندی دا لە هەوڵی هەندێك لە "گروپە چەكدارەكان" بۆ سەپاندنی بڕیاری جەنگ بە شێوەیەكی تاكلایەنە و ڕایگەیاند: ئەم كارە پێشێلكردنی ڕاشكاوانەی دەستوورە و هەڕەشەیەكی گەورەیە بۆ سەر سەروەریی وڵات و سەقامگیریی كۆمەڵگە. 

ڕوونیشی كردەوە "بڵاوبوونەوەی چەك لە دەرەوەی چوارچێوەی دەوڵەت، ئەگەری پێكدادانی ناوخۆیی زیاد دەكات و دەبێتە هۆی پشێوی ئەمنی".

لە كۆتاییدا، سەرۆكی ئەنجومەنی باڵای دادوەری هۆشداری دا كە بڕیارە نافەڕمییەكان بۆ هەڵگیرساندنی جەنگ، عێراق دەخاتە نێو گۆشەگیرییەكی نێودەوڵەتی و ڕووبەڕووی سزای قورسی دەكاتەوە، چونكە ئەو جۆرە ڕەفتارانە هیچ پابەندییەكی یاساییان تێدا نییە و زیانی گەورە بە بەرژەوەندییەكانی دەوڵەت دەگەیەنن.