2 کاتژمێر پێش ئێستا
198 جار خوێنراوەتەوە
سووریا: لە عێراقەوە هێرشێكی بەرفراوانی فڕۆكەی بێفڕۆكەوان کراوەتە سەرمان
پەیام
سوپای سووریا ڕایدەگەیەنێت، ڕووبەڕووی هێرشێكی بەرفراوانی فڕۆكەی بێفڕۆكەوان بووەتەوە كە لە عێراقەوە كراوەتە سەریان.
ئاژانسی هەواڵی فەرمیی سووریا (سانا) ئەمڕۆ دووشەممە لە زاری دەستەی ئۆپەراسیۆنەكانی سوپای وڵاتەكەیەوە ڕایگەیاند، ژمارەیەك فڕۆكەی بێفڕۆكەوان هێرشیان كردووەتە سەر پێگە سەربازییەكانیان لە ناوچە سنوورییەكان لەگەڵ عێراق، بەڵام زۆربەی درۆنەكان پێش گەیشتن بە ئامانجەكانیان خراونەتە خوارەوە.
دەستەی ئۆپەراسیۆنەكان لە ڕاگەیەنراوێكدا ئاماژەی بەوە دا كە یەكەكانیان بە سەركەوتوویی بەرپەرچی زۆرینەی هێرشەكانیان داوەتەوە و تێكیان شكاندوون. جەختیشی كردەوە كە ئێستا خەریكی لێكۆڵینەوەن لە بژاردەكانی بەردەمیان و بە توندی وەڵامی هەر هەڕەشە و دەستدرێژییەك دەدەنەوە كە بكرێتە سەر خاكی سووریا.
ئەم پێشهاتە تەنیا چەند ڕۆژێك دوای ئەوە دێت كە سەباح نوعمان، وتەبێژی فەرماندەی گشتیی هێزە چەكدارەكانی عێراق ئاشكرای كرد، هێزە ئەمنییەكانیان توانیویانە (4) كەسی لە یاسادەرچوو دەستگیر بكەن، كە لە ناحیەی ڕەبیعەی سەر بە پارێزگای نەینەواوە مووشەكیان ئاراستەی خاكی سووریا كردبوو.
نوعمان لەوبارەیەوە ڕایگەیاندبوو: بە هیچ شێوەیەك ڕێگە نادەین خاكەكەمان ببێتە خاڵی دەستپێك بۆ هێرشكردنە سەر هیچ دەوڵەتێك".
لە تۆڕە کۆمەڵایەتیەکان شەیری بکە