04/04/2026
425 جار خوێنراوەتەوە
كارنامەی دانیشتەكانی ئەم هەفتەیەی پەرلەمانى عێراق ڕاگەیەنرا
پەیام
ئەنجوومەنی نوێنەرانی عێراق كارنامەی دانیشتنەكانی دووشەممە و چوارشەممەی ڕاگەیاند و چوارچێوەی هەماهەنگیش جەخت لە بەڕێوەچوونی دانیشتنی 11ی نیسان بۆ هەڵبژاردنی سەرۆك كۆمار دەكاتەوە.
فەرمانگەی ڕاگەیاندنی ئەنجومەنی نوێنەرانی عێراق، خشتەی كارەكانی دانیشتنەكانی داهاتووی بڵاو كردەوە و بەپێی ڕاگەیەنراوەكان "دانیشتنی ڕۆژی دووشەممە تایبەت دەبێت بە تەواوكردنی دەنگدان لەسەر ئەندامانی لیژنە پەرلەمانییە هەمیشەییەكان".
هەروەها دانیشتنی ڕۆژی چوارشەممە دوو بڕگە لە خۆ دەگرێت، یەكەم: خوێندنەوەی یەكەم بۆ پڕۆژەیاسای هەمواری پێنجەمی یاسای فڕۆكەوانی مەدەنی، بڕگەی دووەمیش بریتییە لە خوێندنەوەی یەكەم بۆ پێشنیازەیاسای ئەو پارێزگایانەی لە چوارچێوەی هەرێمدا نین".
لە لایەكی دیكەوە، عەبدولسەمەد زەركوشی سەركردە لە چوارچێوەی هەماهەنگی جەخت لە پابەندبوون بە كاتە دەستوورییەكان دەكاتەوە و ڕایدەگەیەنێت: هیچ پاشەكشەیەك لە بەڕێوەچوونی دانیشتنی 11ی نیسان بۆ هەڵبژاردنی سەرۆككۆمار نییە.
هەر لەو چوارچێوەیەدا، عەبدولسەمەد زەركوشی، ئاماژەی بەوەش كرد "هەفتەی داهاتوو بە مەبەستی گەیشتن بە لێكتێگەیشتنی كۆتایی بۆ یەكلاكردنەوەی پرسی هەڵبژاردنی سەرۆككۆمار سێ بۆ چوار كۆبوونەوەی گرنگ لە بەغداد بەڕێوە دەچن".
لە تۆڕە کۆمەڵایەتیەکان شەیری بکە