"شەڕ بەردەوام بێت، گەشتی حاجییان لە رێگەی ئاسمانییەوە دەکرێتە وشکانی"

پەیام

وتەبێژی بەڕێوەبەرایەتیی گشتیی حەج و عومرەی هەرێم ڕایگەیاند: "لە ئەگەرى بەردەوامبوونى شەڕ لە ناوچەکە، گەشتی حاجییانى هەرێم لە رێگەی ئاسمانییەوە دەکرێتە ڕێگەى وشکانی".

ئەمڕۆ 4ی نیسانی 2026، کاروان ستوونی، وتەبێژی بەڕێوەبەرایەتیی گشتیی حەج و عومرەی هەرێم  ڕاشیگەیاند: "تائێستا ئامادەکارییەکانی پڕۆسەی حەج لە هەرێمی کوردستان، عێراق و سعودییە بەپێی پلانەکان بەردەوامن و سەرەڕای ئەو ئاڵۆزییانەی لە ناوچەکەدا هەن، هیچ جۆرە وەستانێک لە کارەکاندا دروست نەبووە".

سەبارەت بە ڤیزای حاجیان، کاروان ستوونی وتی، "ئێستا ڤیزای سەرجەم حاجیانی هەرێمی کوردستان گەڕاوەتەوە و لەگەڵ دەستپێکردنی وەرزەکەدا هیچ کێشەیەکیان نابێت".

وتیشی، "بڕیارە لە رێکەوتی 18ی نیسانی 2026، ڤیزای حەج بە فەرمی چالاک بکرێت و لەو کاتەوە وەرزی حەج بۆ هەموو وڵاتانی جیهان دەستپێدەکات".

راشیگەیاند، "ئەگەر بارودۆخی ئەمنی و شەڕ لە ناوچەکەدا بەردەوام بێت، بە ئەگەرێکی زۆرەوە گەشتی حاجییان لە رێگەی ئاسمانییەوە دەکرێتە رێگەی وشکانی، لەو بارەیەشەوە حکومەتی هەرێمی کوردستان و وەزارەتی ئەوقاف بڕیاری کۆتایی لەسەر شێوازی گواستنەوەی حاجییان دەدەن".