04/04/2026
317 جار خوێنراوەتەوە
لە دەروازەی سنووریی شەلامچە گەشتیارێكی عێراقی کوژراو هاتوچۆى پێدا ڕاگیرا
پەیام
بەهۆی هێرشێكی ئاسمانیی بۆ سەر دەروازەی سنووریی شەلامچە لە نێوان عێراق و ئێران، كەسێك كوژرا و پێنجی دیكە بریندار بوون، بەو هۆیەشەوە هاتوچۆی بازرگانی و گەشتیارییش لە دەروازەكە ڕاگیرا.
فەریق عومەر وائیلی، سەرۆكی دەستەی دەروازە سنوورییەكانی عێراق، ڕایگەیاند: كاتژمێر 10ی بەیانی هێرشێكی ئاسمانیی كراوەتە سەر دەروازەی سنووریی شەلامچە و تێیدا هۆڵی گەشتیاران بە ئامانج گیراوە.
بە وتەی عومەر وائیلی لە ڕووداوەكەدا "گەشتیارێكی عێراقی گیانی لەدەست داوە و پێنج كەسی دیكەیش بریندار بوون و بە مەبەستی چارەسەر بۆ نەخۆشخانەكانی نێو ئێران گواستراونەتەوە".
وائیلی جەختی لەوە كردەوە كە بەهۆی ڕووداوەكەوە، هاتوچۆی گەشتیاری و بازرگانی لە دەروازەكەدا پەكی كەوتووە، بەڵام دەروازەی "سەفوان" و چەند دەروازەیەكی دیكەی پارێزگاكان وەك جێگرەوە بۆ دابینكردنی كاڵا و پێداویستییەكان بەكار دێن.
هەر لە بارەی ڕووداوەكەوە و لای خۆیەوە، یاریدەدەری ئەمنیی پارێزگاری خوزستانی ئێران ڕایگەیاند: كوژراوەكە شۆفێرێكی عێراقی بووە و دوو كرێكاری ئێرانیش لە ڕووداوەكەدا بریندار بوون.
لە تۆڕە کۆمەڵایەتیەکان شەیری بکە