ستارمر دەچێتە ڕۆژهەڵاتی ناوەڕاست؛ بەریتانیا هەوڵی ئاگربەستی هەمیشەیی دەدات

په‌یام
بڕیارە ئەمڕۆ کیێر ستارمر، سەرۆک وەزیرانی بەریتانیا، گەشتێکی فەرمی بۆ ڕۆژهەڵاتی ناوەڕاست ئەنجام بدات. ئەم سەردانە بە ئامانجی کۆبوونەوە لەگەڵ هاوپەیمانە ناوچەییەکان و پاڵپشتیکردنی هەوڵەکانی ڕاگەیاندنی ئاگربەست دێت. 
وەزیرێکی حکومەتی بەریتانیا ڕایگەیاند کە ئەرکی سەرەکی ستارمر لەم گەشتەدا، جەختکردنەوەیە لەسەر پێویستیی ڕاگرتنی شەڕ و هاندانی لایەنەکان بۆ گەیشتن بە ڕێککەوتنێکی ئاشتی. ئاماژەی بەوەش کرد کە لەندەن تەواوی تواناکانی خۆی خستووەتە گەڕ بۆ ئەوەی گەرەنتی ئەوە بکات کە هەر جۆرە ڕێککەوتنێکی ئاگربەست ببێتە ئاشتییەکی هەمیشەیی و سەقامگیری بۆ ناوچەکە بگەڕێنێتەوە. 
لە بەشێکی تری لێدوانەکانیدا، ئەو وەزیرە بەریتانییە ئاشکرای کرد کە وڵاتەکەی ڕۆڵێکی پێشەنگ دەگێڕێت لە کۆکردنەوەی نزیکەی ٤٠ دەوڵەت بۆ تاوتوێکردنی ئەو ئاڵنگارییانەی ڕووبەڕووی گەرووە نێودەوڵەتییەکان دەبنەوە. ئامانجی ئەم هەوڵە نێودەوڵەتییە، دۆزینەوەی میکانیزمێکە بۆ دەستەبەرکردنی ئاسایشی هاتوچۆی دەریایی و کردنەوەی گەرووەکە لە زووترین کاتدا، بە مەبەستی ئاساییکردنەوەی ژیان و جوڵەی بازرگانی لە ناوچەکەدا.